៥. កុម្ភវគ្គោ

២៩១. សុរាឃដជាតកំ (២-៥-១)

១២១. សព្ពកាមទទំ កុម្ភំ, កុដំ លទ្ធាន ធុត្តកោ;

យាវ នំ អនុបាលេតិ, តាវ សោ សុខមេធតិ.

១២២. យទា មត្តោ ច ទិត្តោ ច, បមាទា កុម្ភមព្ភិទា;

តទា នគ្គោ ច បោត្ថោ ច, បច្ឆា ពាលោ វិហញ្ញតិ.

១២៣. ឯវមេវ យោ ធនំ លទ្ធា, បមត្តោ [អមត្តា (សី.), អមត្តោ (បី.)] បរិភុញ្ជតិ;

បច្ឆា តប្បតិ ទុម្មេធោ, កុដំ ភិត្វាវ [កុដំ ភិន្នោវ (សី. បី.), កុដភិន្នោវ (?)] ធុត្តកោតិ.

សុរាឃដ [ភទ្រឃដ (សី. បី.), ភទ្រឃដភេទក (ស្យា.)] ជាតកំ បឋមំ.

២៩២. សុបត្តជាតកំ (៣-៥-២)

១២៤. ពារាណស្យំ [ពារាណស្សំ (សី. បី.)] មហារាជ, កាករាជា និវាសកោ [និវាសិកោ (សី. បី.)];

អសីតិយា សហស្សេហិ, សុបត្តោ បរិវារិតោ.

១២៥. តស្ស ទោហឡិនី ភរិយា, សុផស្សា ភក្ខិតុមិច្ឆតិ [មច្ឆមិច្ឆតិ (សី. បី.)];

រញ្ញោ មហានសេ បក្កំ, បច្ចគ្ឃំ រាជភោជនំ.

១២៦. តេសាហំ បហិតោ ទូតោ, រញ្ញោ ចម្ហិ ឥធាគតោ;

ភត្តុ អបចិតិំ កុម្មិ, នាសាយមករំ [មករិំ (សី. និស្សយ)] វណន្តិ.

សុបត្តជាតកំ ទុតិយំ.

២៩៣. កាយនិព្ពិន្ទជាតកំ (៣-៥-៣)

១២៧. ផុដ្ឋស្ស មេ អញ្ញតរេន ព្យាធិនា, រោគេន ពាឡ្ហំ ទុខិតស្ស រុប្បតោ;

បរិសុស្សតិ ខិប្បមិទំ កឡេវរំ, បុប្ផំ យថា បំសុនិ អាតបេ កតំ.

១២៨. អជញ្ញំ ជញ្ញសង្ខាតំ, អសុចិំ សុចិសម្មតំ;

នានាកុណបបរិបូរំ, ជញ្ញរូបំ អបស្សតោ.

១២៩. ធិរត្ថុមំ អាតុរំ បូតិកាយំ, ជេគុច្ឆិយំ អស្សុចិំ ព្យាធិធម្មំ;

យត្ថប្បមត្តា អធិមុច្ឆិតា បជា, ហាបេន្តិ មគ្គំ សុគតូបបត្តិយាតិ.

កាយនិព្ពិន្ទ [កាយវិច្ឆន្ទ (សី.), កាយវិច្ឆិន្ទ (បី.)] ជាតកំ តតិយំ.

២៩៤. ជម្ពុខាទកជាតកំ (៣-៥-៤)

១៣០. កោយំ ពិន្ទុស្សរោ វគ្គុ, សរវន្តាន [បវទន្តាន (សី. បី.)] មុត្តមោ;

អច្ចុតោ ជម្ពុសាខាយ, មោរច្ឆាបោវ កូជតិ.

១៣១. កុលបុត្តោវ ជានាតិ [កុលបុត្តោ បជានាតិ (ស្យា. ក.)], កុលបុត្តំ [កុលបុត្តេ (សី. បី.)] បសំសិតុំ;

ព្យគ្ឃច្ឆាបសរីវណ្ណ, ភុញ្ជ សម្ម ទទាមិ តេ.

១៣២. ចិរស្សំ វត បស្សាមិ, មុសាវាទី សមាគតេ;

វន្តាទំ កុណបាទញ្ច, អញ្ញមញ្ញំ បសំសកេតិ.

ជម្ពុខាទកជាតកំ ចតុត្ថំ.

២៩៥. អន្តជាតកំ (៣-៥-៥)

១៣៣. ឧសភស្សេវ តេ ខន្ធោ, សីហស្សេវ វិជម្ភិតំ;

មិគរាជ នមោ ត្យត្ថុ, អបិ កិញ្ចិ លភាមសេ.

១៣៤. កុលបុត្តោវ ជានាតិ, កុលបុត្តំ បសំសិតុំ;

មយូរគីវសង្កាស, ឥតោ បរិយាហិ វាយស.

១៣៥. មិគានំ សិង្គាលោ [កោត្ថុកោ (សី. បី.), កោដ្ឋុកោ (ស្យា.)] អន្តោ, បក្ខីនំ បន វាយសោ;

ឯរណ្ឌោ អន្តោ រុក្ខានំ, តយោ អន្តា សមាគតាតិ.

អន្តជាតកំ បញ្ចមំ.

២៩៦. សមុទ្ទជាតកំ (៣-៥-៦)

១៣៦. កោ នាយំ [កោ ន្វាយំ (ស្យា.)] លោណតោយស្មិំ, សមន្តា បរិធាវតិ;

មច្ឆេ មករេ ច វារេតិ, ឩមីសុ ច វិហញ្ញតិ.

១៣៧. អនន្តបាយី សកុណោ, អតិត្តោតិ ទិសាសុតោ;

សមុទ្ទំ បាតុមិច្ឆាមិ, សាគរំ សរិតំ បតិំ.

១៣៨. សោ អយំ ហាយតិ ចេវ, បូរតេ ច មហោទធិ;

នាស្ស នាយតិ បីតន្តោ, អបេយ្យោ កិរ សាគរោតិ.

សមុទ្ទជាតកំ ឆដ្ឋំ.

២៩៧. កាមវិលាបជាតកំ (៣-៥-៧)

១៣៩. ឧច្ចេ សកុណ ឌេមាន, បត្តយាន វិហង្គម;

វជ្ជាសិ ខោ ត្វំ វាមូរុំ, ចិរំ ខោ សា ករិស្សតិ [សរិស្សតិ (ក.)].

១៤០. ឥទំ ខោ សា ន ជានាតិ, អសិំ សត្តិញ្ច ឱឌ្ឌិតំ;

សា ចណ្ឌី កាហតិ កោធំ, តំ មេ តបតិ នោ ឥទំ [នោ ឥធ (សី. ស្យា. បី.)].

១៤១. ឯស ឧប្បលសន្នាហោ, និក្ខញ្ចុស្សីសកោហិតំ [និក្ខមុស្សីសកេ កតំ (សី. បី.), និក្ខញ្ចុស្សីសកេ កតំ (ស្យា.)];

កាសិកញ្ច មុទុំ វត្ថំ, តប្បេតុ ធនិកា បិយាតិ [ធនកាមិយាតិ (ស្យា. បី.), ធនកាមិកាតិ (សី.)].

កាមវិលាបជាតកំ សត្តមំ.

២៩៨. ឧទុម្ពរជាតកំ (៣-៥-៨)

១៤២. ឧទុម្ពរា ចិមេ បក្កា, និគ្រោធា ច កបិត្ថនា;

ឯហិ និក្ខម ភុញ្ជស្សុ, កិំ ជិឃច្ឆាយ មិយ្យសិ.

១៤៣. ឯវំ សោ សុហិតោ ហោតិ, យោ វុឌ្ឍមបចាយតិ;

យថាហមជ្ជ សុហិតោ, ទុមបក្កានិ មាសិតោ.

១៤៤. យំ វនេជោ វនេជស្ស, វញ្ចេយ្យ កបិនោ កបិ;

ទហរោ កបិ [ទហរោបិ តំ ន (សី. បី.), ទហរោបិ ន (ស្យា.)] សទ្ធេយ្យ, ន ហិ ជិណ្ណោ ជរាកបីតិ.

ឧទុម្ពរជាតកំ អដ្ឋមំ.

២៩៩. កោមារបុត្តជាតកំ (៣-៥-៩)

១៤៥. បុរេ តុវំ សីលវតំ សកាសេ, ឱក្កន្តិកំ [ឱក្កន្ទិកំ (សី. ស្យា. បី.)] កីឡសិ អស្សមម្ហិ;

ករោហរេ [ករោហិ រេ (ក.)] មក្កដិយានិ មក្កដ, ន តំ មយំ សីលវតំ រមាម.

១៤៦. សុតា ហិ មយ្ហំ បរមា វិសុទ្ធិ, កោមារបុត្តស្ស ពហុស្សុតស្ស;

មា ទានិ មំ មញ្ញិ តុវំ យថា បុរេ, ឈានានុយុត្តោ វិហរាមិ [ឈានានុយុត្តា វិហរាម (សី. បី.)] អាវុសោ.

១៤៧. សចេបិ សេលស្មិ វបេយ្យ ពីជំ, ទេវោ ច វស្សេ ន ហិ តំ វិរូឡ្ហេ [នេវ ហិ តំ រុហេយ្យ (សី. បី.), ន ហិ តំ វិរូហេ (?)];

សុតា ហិ តេ សា បរមា វិសុទ្ធិ, អារា តុវំ មក្កដ ឈានភូមិយាតិ.

កោមារបុត្តជាតកំ នវមំ.

៣០០. វកជាតកំ (៣-៥-១០)

១៤៨. បរបាណរោធា [បរបាណឃាតេ (ស្យា.), បរបាណរោចំ (ក.)] ជីវន្តោ, មំសលោហិតភោជនោ;

វកោ វតំ សមាទាយ, ឧបបជ្ជិ ឧបោសថំ.

១៤៩. តស្ស សក្កោ វតញ្ញាយ, អជរូបេនុបាគមិ;

វីតតបោ អជ្ឈប្បត្តោ, ភញ្ជិ លោហិតបោ តបំ.

១៥០. ឯវមេវ ឥធេកច្ចេ, សមាទានម្ហិ ទុព្ពលា;

លហុំ ករោន្តិ អត្តានំ, វកោវ អជការណាតិ.

វកជាតកំ ទសមំ.

កុម្ភវគ្គោ បញ្ចមោ.

តស្សុទ្ទានំ –

វរកុម្ភ សុបត្តសិរិវ្ហយនោ, សុចិសម្មត ពិន្ទុសរោ ចុសភោ;

សរិតំបតិ ចណ្ឌិ ជរាកបិនា, អថ មក្កដិយា វកកេន ទសាតិ.

អថ វគ្គុទ្ទានំ –

សង្កប្បោ បទុមោ ចេវ, ឧទបានេន តតិយំ;

អព្ភន្តរំ ឃដភេទំ, តិកនិបាតម្ហិលង្កតន្តិ.

តិកនិបាតំ និដ្ឋិតំ.