២៧៧. រោមកជាតកំ (៣-៣-៧)

៧៩. វស្សានិ បញ្ញាស សមាធិកានិ, វសិម្ហ សេលស្ស គុហាយ រោមក;

អសង្កមានា អភិនិព្ពុតត្តា [អភិនិព្ពុតចិត្តា (ស្យា. ក.)], ហត្ថត្ត [ហត្ថត្ថ (ស្យា.)] មាយន្តិ មមណ្ឌជា បុរេ.

៨០. តេ ទានិ វក្កង្គ កិមត្ថមុស្សុកា, ភជន្តិ អញ្ញំ គិរិកន្ទរំ ទិជា;

ន នូន មញ្ញន្តិ មមំ យថា បុរេ, ចិរប្បវុត្ថា អថ វា ន តេ ឥមេ.

៨១. ជានាម តំ ន មយំ សម្បមូឡ្ហា [ន មយ’មស្ម មូឡ្ហា (សី. បី.)], សោយេវ ត្វំ តេ មយមស្ម នាញ្ញេ;

ចិត្តញ្ច តេ អស្មិំ ជនេ បទុដ្ឋំ, អាជីវិកា [អាជីវក (សី. ស្យា.), អាជីវិក (បី.)] តេន តមុត្តសាមាតិ.

រោមកជាតកំ សត្តមំ.