៣. ឧទបានវគ្គោ

២៧១. ឧទបានទូសកជាតកំ (៣-៣-១)

៦១. អារញ្ញិកស្ស ឥសិនោ, ចិររត្តំ តបស្សិនោ;

កិច្ឆាកតំ ឧទបានំ, កថំ សម្ម អវាហសិ [អវាហយិ (សី. បី.), អបាហសិ (ស្យា.)].

៦២. ឯស ធម្មោ សិង្គាលានំ, យំ បិត្វា ឱហទាមសេ;

បិតុបិតាមហំ ធម្មោ, ន តំ [ន នំ (សី. បី.)] ឧជ្ឈាតុមរហសិ.

៦៣. យេសំ វោ ឯទិសោ ធម្មោ, អធម្មោ បន កីទិសោ;

មា វោ ធម្មំ អធម្មំ វា, អទ្ទសាម កុទាចនន្តិ.

ឧទបានទូសកជាតកំ បឋមំ.

២៧២. ព្យគ្ឃជាតកំ (៣-៣-២)

៦៤. យេន មិត្តេន សំសគ្គា, យោគក្ខេមោ វិហិយ្យតិ;

បុព្ពេវជ្ឈាភវំ តស្ស, រុក្ខេ អក្ខីវ បណ្ឌិតោ.

៦៥. យេន មិត្តេន សំសគ្គា, យោគក្ខេមោ បវឌ្ឍតិ;

ករេយ្យត្តសមំ វុត្តិំ, សព្ពកិច្ចេសុ បណ្ឌិតោ.

៦៦. ឯថ ព្យគ្ឃា និវត្តវ្ហោ, បច្ចុបេថ [បច្ចមេថ (សី. បី.)] មហាវនំ;

មា វនំ ឆិន្ទិ និព្យគ្ឃំ, ព្យគ្ឃា មាហេសុ និព្ពនាតិ.

ព្យគ្ឃជាតកំ ទុតិយំ.

២៧៣. កច្ឆបជាតកំ (៣-៣-៣)

៦៧. កោ នុ ឧទ្ធិតភត្តោវ [ឧទ្ទិតភត្តោវ (សី.), វឌ្ឍិតភត្តោវ (ស្យា.)], បូរហត្ថោវ ព្រាហ្មណោ;

កហំ នុ ភិក្ខំ អចរិ, កំ សទ្ធំ ឧបសង្កមិ.

៦៨. អហំ កបិស្មិ ទុម្មេធោ, អនាមាសានិ អាមសិំ;

ត្វំ មំ មោចយ ភទ្ទន្តេ, មុត្តោ គច្ឆេយ្យ បព្ពតំ.

៦៩. កច្ឆបា កស្សបា ហោន្តិ, កោណ្ឌញ្ញា ហោន្តិ មក្កដា;

មុញ្ច កស្សប កោណ្ឌញ្ញំ, កតំ មេថុនកំ តយាតិ.

កច្ឆបជាតកំ តតិយំ.

២៧៤. លោលជាតកំ (៣-៣-៤)

៧០. កាយំ ពលាកា សិខិនី, ចោរី លង្ឃិបិតាមហា;

ឱរំ ពលាកេ អាគច្ឆ, ចណ្ឌោ មេ វាយសោ សខា.

៧១. នាហំ ពលាកា សិខិនី, អហំ លោលោស្មិ វាយសោ;

អកត្វា វចនំ តុយ្ហំ, បស្ស លូនោស្មិ អាគតោ.

៧២. បុនបាបជ្ជសី សម្ម, សីលញ្ហិ តវ តាទិសំ;

ន ហិ មានុសកា ភោគា, សុភុញ្ជា ហោន្តិ បក្ខិនាតិ.

លោលជាតកំ ចតុត្ថំ.

២៧៥. រុចិរជាតកំ (៣-៣-៥)

៧៣. កាយំ ពលាកា រុចិរា, កាកនីឡស្មិមច្ឆតិ;

ចណ្ឌោ កាកោ សខា មយ្ហំ, យស្ស [តស្ស (សី. បី.)] ចេតំ កុលាវកំ.

៧៤. ននុ មំ សម្ម ជានាសិ, ទិជ សាមាកភោជន;

អកត្វា វចនំ តុយ្ហំ, បស្ស លូនោស្មិ អាគតោ.

៧៥. បុនបាបជ្ជសី សម្ម, សីលញ្ហិ តវ តាទិសំ;

ន ហិ មានុសកា ភោគា, សុភុញ្ជា ហោន្តិ បក្ខិនាតិ.

រុចិរជាតកំ បញ្ចមំ.

២៧៦. កុរុធម្មជាតកំ (៣-៣-៦)

៧៦. តវ សទ្ធញ្ច សីលញ្ច, វិទិត្វាន ជនាធិប;

វណ្ណំ អញ្ជនវណ្ណេន, កាលិង្គស្មិំ និមិម្ហសេ [វិនិម្ហសេ (ស្យា.), វនិម្ហសេ (ក.)].

៧៧. អន្នភច្ចា ចភច្ចា ច, យោធ ឧទ្ទិស្ស គច្ឆតិ;

សព្ពេ តេ អប្បដិក្ខិប្បា, បុព្ពាចរិយវចោ ឥទំ.

៧៨. ទទាមិ វោ ព្រាហ្មណា នាគមេតំ, រាជារហំ រាជភោគ្គំ យសស្សិនំ;

អលង្កតំ ហេមជាលាភិឆន្នំ, សសារថិំ គច្ឆថ យេន កាមន្តិ.

កុរុធម្មជាតកំ [កុរុធម្មជាតកំ (សី. ស្យា. បី.)] ឆដ្ឋំ.

២៧៧. រោមកជាតកំ (៣-៣-៧)

៧៩. វស្សានិ បញ្ញាស សមាធិកានិ, វសិម្ហ សេលស្ស គុហាយ រោមក;

អសង្កមានា អភិនិព្ពុតត្តា [អភិនិព្ពុតចិត្តា (ស្យា. ក.)], ហត្ថត្ត [ហត្ថត្ថ (ស្យា.)] មាយន្តិ មមណ្ឌជា បុរេ.

៨០. តេ ទានិ វក្កង្គ កិមត្ថមុស្សុកា, ភជន្តិ អញ្ញំ គិរិកន្ទរំ ទិជា;

ន នូន មញ្ញន្តិ មមំ យថា បុរេ, ចិរប្បវុត្ថា អថ វា ន តេ ឥមេ.

៨១. ជានាម តំ ន មយំ សម្បមូឡ្ហា [ន មយ’មស្ម មូឡ្ហា (សី. បី.)], សោយេវ ត្វំ តេ មយមស្ម នាញ្ញេ;

ចិត្តញ្ច តេ អស្មិំ ជនេ បទុដ្ឋំ, អាជីវិកា [អាជីវក (សី. ស្យា.), អាជីវិក (បី.)] តេន តមុត្តសាមាតិ.

រោមកជាតកំ សត្តមំ.

២៧៨. មហិំសរាជជាតកំ (៣-៣-៨)

៨២. កិមត្ថ [កមត្ថ (សី. បី.)] មភិសន្ធាយ, លហុចិត្តស្ស ទុព្ភិនោ [ទូភិនោ (សី. បី.)];

សព្ពកាមទទស្សេវ [ទុហស្សេវ (សី. ស្យា. បី.), រហស្សេវ (ក.)], ឥមំ ទុក្ខំ តិតិក្ខសិ.

៨៣. សិង្គេន និហនាហេតំ, បទសា ច អធិដ្ឋហ;

ភិយ្យោ [ភីយោ (សី.)] ពាលា បកុជ្ឈេយ្យុំ, នោ ចស្ស បដិសេធកោ.

៨៤. មមេវាយំ មញ្ញមានោ, អញ្ញេបេវំ [អញ្ញម្បេវំ (សី. ស្យា. បី.)] ករិស្សតិ;

តេ នំ តត្ថ វធិស្សន្តិ, សា មេ មុត្តិ ភវិស្សតីតិ.

មហិំសរាជជាតកំ [មហិសជាតកំ (សី. ស្យា. បី.)] អដ្ឋមំ.

២៧៩. សតបត្តជាតកំ (៣-៣-៩)

៨៥. យថា មាណវកោ បន្ថេ, សិង្គាលិំ វនគោចរិំ;

អត្ថកាមំ បវេទេន្តិំ [បវទន្តិំ (បី.)], អនត្ថកាមាតិ មញ្ញតិ;

អនត្ថកាមំ សតបត្តំ, អត្ថកាមោតិ មញ្ញតិ.

៨៦. ឯវមេវ ឥធេកច្ចោ, បុគ្គលោ ហោតិ តាទិសោ;

ហិតេហិ វចនំ វុត្តោ, បដិគណ្ហាតិ វាមតោ.

៨៧. យេ ច ខោ នំ បសំសន្តិ, ភយា ឧក្កំសយន្តិ វា [ច (សី. បី.)];

តញ្ហិ សោ មញ្ញតេ មិត្តំ, សតបត្តំវ មាណវោតិ.

សតបត្តជាតកំ នវមំ.

២៨០. បុដទូសកជាតកំ (៣-៣-១០)

៨៨. អទ្ធា ហិ នូន មិគរាជា, បុដកម្មស្ស កោវិទោ;

តថា ហិ បុដំ ទូសេតិ, អញ្ញំ នូន ករិស្សតិ.

៨៩. ន មេ មាតា វា បិតា វា, បុដកម្មស្ស កោវិទោ;

កតំ កតំ ខោ ទូសេម, ឯវំ ធម្មមិទំ កុលំ.

៩០. យេសំ វោ ឯទិសោ ធម្មោ, អធម្មោ បន កីទិសោ;

មា វោ ធម្មំ អធម្មំ វា, អទ្ទសាម កុទាចនន្តិ.

បុដទូសកជាតកំ ទសមំ.

ឧទបានវគ្គោ [អរញ្ញវគ្គោ (សី. បី. ក.)] តតិយោ.

តស្សុទ្ទានំ –

ឧទបានវរំ វនព្យគ្ឃ កបិ, សិខិនី ច ពលាក រុចិរវរោ;

សុជនាធិបរោមកទូស បុន, សតបត្តវរោ បុដកម្ម ទសាតិ.