២៧៨. មហិំសរាជជាតកំ (៣-៣-៨)

៨២. កិមត្ថ [កមត្ថ (សី. បី.)] មភិសន្ធាយ, លហុចិត្តស្ស ទុព្ភិនោ [ទូភិនោ (សី. បី.)];

សព្ពកាមទទស្សេវ [ទុហស្សេវ (សី. ស្យា. បី.), រហស្សេវ (ក.)], ឥមំ ទុក្ខំ តិតិក្ខសិ.

៨៣. សិង្គេន និហនាហេតំ, បទសា ច អធិដ្ឋហ;

ភិយ្យោ [ភីយោ (សី.)] ពាលា បកុជ្ឈេយ្យុំ, នោ ចស្ស បដិសេធកោ.

៨៤. មមេវាយំ មញ្ញមានោ, អញ្ញេបេវំ [អញ្ញម្បេវំ (សី. ស្យា. បី.)] ករិស្សតិ;

តេ នំ តត្ថ វធិស្សន្តិ, សា មេ មុត្តិ ភវិស្សតីតិ.

មហិំសរាជជាតកំ [មហិសជាតកំ (សី. ស្យា. បី.)] អដ្ឋមំ.