១៤. ឯករាជចរិយា

១១៤. ‘‘បុនាបរំ យទា ហោមិ, ឯករាជាតិ វិស្សុតោ;

បរមំ សីលំ អធិដ្ឋាយ, បសាសាមិ មហាមហិំ.

១១៥. ‘‘ទស កុសលកម្មបថេ, វត្តាមិ អនវសេសតោ;

ចតូហិ សង្គហវត្ថូហិ, សង្គណ្ហាមិ [សង្គហាមិ (ក.)] មហាជនំ.

១១៦. ‘‘ឯវំ មេ អប្បមត្តស្ស, ឥធ លោកេ បរត្ថ ច;

ទព្ពសេនោ ឧបគន្ត្វា, អច្ឆិន្ទន្តោ បុរំ មម.

១១៧. ‘‘រាជូបជីវេ និគមេ, សពលដ្ឋេ សរដ្ឋកេ;

សព្ពំ ហត្ថគតំ កត្វា, កាសុយា និខណី មមំ.

១១៨. ‘‘អមច្ចមណ្ឌលំ រជ្ជំ, ផីតំ អន្តេបុរំ មម;

អច្ឆិន្ទិត្វាន គហិតំ, បិយំ បុត្តំវ បស្សហំ;

មេត្តាយ មេ សមោ នត្ថិ, ឯសា មេ មេត្តាបារមី’’តិ.

ឯករាជចរិយំ ចុទ្ទសមំ.