១៥. មហាលោមហំសចរិយា

១១៩. ‘‘សុសានេ សេយ្យំ កប្បេមិ, ឆវដ្ឋិកំ ឧបនិធាយហំ;

គាមណ្ឌលា [គោមណ្ឌលា (សី.), គាមមណ្ឌលា (ស្យា.)] ឧបាគន្ត្វា, រូបំ ទស្សេន្តិនប្បកំ.

១២០. ‘‘អបរេ គន្ធមាលញ្ច, ភោជនំ វិវិធំ ពហុំ;

ឧបាយនានូបនេន្តិ, ហដ្ឋា សំវិគ្គមានសា.

១២១. ‘‘យេ មេ ទុក្ខំ ឧបហរន្តិ, យេ ច ទេន្តិ សុខំ មម;

សព្ពេសំ សមកោ ហោមិ, ទយា កោបោ ន វិជ្ជតិ.

១២២. ‘‘សុខទុក្ខេ តុលាភូតោ, យសេសុ អយសេសុ ច;

សព្ពត្ថ សមកោ ហោមិ, ឯសា មេ ឧបេក្ខាបារមី’’តិ.

មហាលោមហំសចរិយំ បន្នរសមំ.

យុធញ្ជយវគ្គោ តតិយោ.