១១. កណ្ហទីបាយនចរិយា

៩២. ‘‘បុនាបរំ យទា ហោមិ, កណ្ហទីបាយនោ ឥសិ;

បរោបញ្ញាសវស្សានិ, អនភិរតោចរិំ អហំ.

៩៣. ‘‘ន កោចិ ឯតំ ជានាតិ, អនភិរតិមនំ មម;

អហញ្ហិ កស្សចិ នាចិក្ខិំ, អរតិ មេ ចរតិ មានសេ.

៩៤. ‘‘សព្រហ្មចារី មណ្ឌព្យោ, សហាយោ មេ មហាឥសិ;

បុព្ពកម្មសមាយុត្តោ, សូលមារោបនំ លភិ.

៩៥. ‘‘តមហំ ឧបដ្ឋហិត្វាន, អារោគ្យមនុបាបយិំ;

អាបុច្ឆិត្វាន អាគញ្ឆិំ, យំ មយ្ហំ សកមស្សមំ.

៩៦. ‘‘សហាយោ ព្រាហ្មណោ មយ្ហំ, ភរិយំ អាទាយ បុត្តកំ;

តយោ ជនា សមាគន្ត្វា, អាគញ្ឆុំ បាហុនាគតំ.

៩៧. ‘‘សម្មោទមានោ តេហិ សហ, និសិន្នោ សកមស្សមេ;

ទារកោ វដ្ដមនុក្ខិបំ, អាសីវិសមកោបយិ.

៩៨. ‘‘តតោ សោ វដ្ដគតំ មគ្គំ, អន្វេសន្តោ កុមារកោ;

អាសីវិសស្ស ហត្ថេន, ឧត្តមង្គំ បរាមសិ.

៩៩. ‘‘តស្ស អាមសនេ កុទ្ធោ, សប្បោ វិសពលស្សិតោ;

កុបិតោ បរមកោបេន, អឌំសិ ទារកំ ខណេ.

១០០. ‘‘សហទដ្ឋោ អាសីវិសេន [អតិវិសេន (បី. ក.)], ទារកោ បបតិ [បតតិ (ក.)] ភូមិយំ;

តេនាហំ ទុក្ខិតោ អាសិំ, មម វាហសិ តំ ទុក្ខំ.

១០១. ‘‘ត្យាហំ អស្សាសយិត្វាន, ទុក្ខិតេ សោកសល្លិតេ;

បឋមំ អកាសិំ កិរិយំ, អគ្គំ សច្ចំ វរុត្តមំ.

១០២. ‘‘‘សត្តាហមេវាហំ បសន្នចិត្តោ, បុញ្ញត្ថិកោ អចរិំ ព្រហ្មចរិយំ;

អថាបរំ យំ ចរិតំ មមេទំ, វស្សានិ បញ្ញាសសមាធិកានិ.

១០៣. ‘‘‘អកាមកោ វាហិ អហំ ចរាមិ, ឯតេន សច្ចេន សុវត្ថិ ហោតុ;

ហតំ វិសំ ជីវតុ យញ្ញទត្តោ’.

១០៤. ‘‘សហ សច្ចេ កតេ មយ្ហំ, វិសវេគេន វេធិតោ;

អពុជ្ឈិត្វាន វុដ្ឋាសិ, អរោគោ ចាសិ មាណវោ;

សច្ចេន មេ សមោ នត្ថិ, ឯសា មេ សច្ចបារមី’’តិ.

កណ្ហទីបាយនចរិយំ ឯកាទសមំ.