១២. សុតសោមចរិយា

១០៥. ‘‘បុនាបរំ យទា ហោមិ, សុតសោមោ មហីបតិ;

គហិតោ បោរិសាទេន, ព្រាហ្មណេ សង្គរំ សរិំ.

១០៦. ‘‘ខត្តិយានំ ឯកសតំ, អាវុណិត្វា ករត្តលេ;

ឯតេសំ បមិលាបេត្វា, យញ្ញត្ថេ ឧបនយី មមំ.

១០៧. ‘‘អបុច្ឆិ មំ បោរិសាទោ, ‘កិំ ត្វំ ឥច្ឆសិ និស្សជំ;

យថាមតិ តេ កាហាមិ, យទិ មេ ត្វំ បុនេហិសិ’.

១០៨. ‘‘តស្ស បដិស្សុណិត្វាន, បណ្ហេ អាគមនំ មម;

ឧបគន្ត្វា បុរំ រម្មំ, រជ្ជំ និយ្យាទយិំ តទា.

១០៩. ‘‘អនុស្សរិត្វា សតំ ធម្មំ, បុព្ពកំ ជិនសេវិតំ;

ព្រាហ្មណស្ស ធនំ ទត្វា, បោរិសាទំ ឧបាគមិំ.

១១០. ‘‘នត្ថិ មេ សំសយោ តត្ថ, ឃាតយិស្សតិ វា ន វា;

សច្ចវាចានុរក្ខន្តោ, ជីវិតំ ចជិតុមុបាគមិំ;

សច្ចេន មេ សមោ នត្ថិ, ឯសា មេ សច្ចបារមី’’តិ.

សុតសោមចរិយំ ទ្វាទសមំ.