១០. មច្ឆរាជចរិយា

៨៣. ‘‘បុនាបរំ យទា ហោមិ, មច្ឆរាជា មហាសរេ;

ឧណ្ហេ សូរិយសន្តាបេ, សរេ ឧទក ខីយថ.

៨៤. ‘‘តតោ កាកា ច គិជ្ឈា ច, កង្កា [ពកា (សី.)] កុលលសេនកា;

ភក្ខយន្តិ ទិវារត្តិំ, មច្ឆេ ឧបនិសីទិយ.

៨៥. ‘‘ឯវំ ចិន្តេសហំ តត្ថ, សហ ញាតីហិ បីឡិតោ;

‘កេន នុ ខោ ឧបាយេន, ញាតី ទុក្ខា បមោចយេ’.

៨៦. ‘‘វិចិន្តយិត្វា ធម្មត្ថំ, សច្ចំ អទ្ទស បស្សយំ;

សច្ចេ ឋត្វា បមោចេសិំ, ញាតីនំ តំ អតិក្ខយំ.

៨៧. ‘‘អនុស្សរិត្វា សតំ ធម្មំ, បរមត្ថំ វិចិន្តយំ;

អកាសិ សច្ចកិរិយំ, យំ លោកេ ធុវសស្សតំ.

៨៨. ‘‘‘យតោ សរាមិ អត្តានំ, យតោ បត្តោស្មិ វិញ្ញុតំ;

នាភិជានាមិ សញ្ចិច្ច, ឯកបាណម្បិ ហិំសិតំ.

៨៩. ‘‘‘ឯតេន សច្ចវជ្ជេន, បជ្ជុន្នោ អភិវស្សតុ;

អភិត្ថនយ បជ្ជុន្ន, និធិំ កាកស្ស នាសយ;

កាកំ សោកាយ រន្ធេហិ, មច្ឆេ សោកា បមោចយ’.

៩០. ‘‘សហកតេ សច្ចវរេ, បជ្ជុន្នោ អភិគជ្ជិយ;

ថលំ និន្នញ្ច បូរេន្តោ, ខណេន អភិវស្សថ.

៩១. ‘‘ឯវរូបំ សច្ចវរំ, កត្វា វីរិយមុត្តមំ;

វស្សាបេសិំ មហាមេឃំ, សច្ចតេជពលស្សិតោ;

សច្ចេន មេ សមោ នត្ថិ, ឯសា មេ សច្ចបារមី’’តិ.

មច្ឆរាជចរិយំ ទសមំ.