១០. សង្ខបាលចរិយា

៨៥. ‘‘បុនាបរំ យទា ហោមិ, សង្ខបាលោ មហិទ្ធិកោ;

ទាឋាវុធោ ឃោរវិសោ, ទ្វិជិវ្ហោ ឧរគាធិភូ.

៨៦. ‘‘ចតុប្បថេ មហាមគ្គេ, នានាជនសមាកុលេ;

ចតុរោ អង្គេ អធិដ្ឋាយ, តត្ថ វាសមកប្បយិំ.

៨៧. ‘‘ឆវិយា ចម្មេន មំសេន, នហារុអដ្ឋិកេហិ វា;

យស្ស ឯតេន ករណីយំ, ទិន្នំយេវ ហរាតុ សោ.

៨៨. ‘‘អទ្ទសំសុ ភោជបុត្តា, ខរា លុទ្ទា អការុណា;

ឧបគញ្ឆុំ មមំ តត្ថ, ទណ្ឌមុគ្គរបាណិនោ.

៨៩. ‘‘នាសាយ វិនិវិជ្ឈិត្វា, នង្គុដ្ឋេ បិដ្ឋិកណ្ដកេ;

កាជេ អារោបយិត្វាន, ភោជបុត្តា ហរិំសុ មំ.

៩០. ‘‘សសាគរន្តំ បថវិំ, សកាននំ សបព្ពតំ;

ឥច្ឆមានោ ចហំ តត្ថ, នាសាវាតេន ឈាបយេ.

៩១. ‘‘សូលេហិ វិនិវិជ្ឈន្តេ, កោដ្ដយន្តេបិ សត្តិភិ;

ភោជបុត្តេ ន កុប្បាមិ, ឯសា មេ សីលបារមី’’តិ.

សង្ខបាលចរិយំ ទសមំ.

ហត្ថិនាគវគ្គោ ទុតិយោ.

តស្សុទ្ទានំ –

ហត្ថិនាគោ ភូរិទត្តោ, ចម្បេយ្យោ ពោធិ មហិំសោ;

រុរុ មាតង្គោ ធម្មោ ច, អត្រជោ ច ជយទ្ទិសោ.

ឯតេ នវ សីលពលា, បរិក្ខារា បទេសិកា;

ជីវិតំ បរិរក្ខិត្វា, សីលានិ អនុរក្ខិសំ.

សង្ខបាលស្ស មេ សតោ, សព្ពកាលម្បិ ជីវិតំ;

យស្ស កស្សចិ និយ្យត្តំ, តស្មា សា សីលបារមីតិ.

សីលបារមិនិទ្ទេសោ និដ្ឋិតោ.