៥. បញ្ចមសិក្ខាបទវណ្ណនា

៩០៣. បញ្ចមេ – ចីវរសង្កមនីយន្តិ សង្កមេតព្ពំ ចីវរំ; អញ្ញិស្សា សន្តកំ អនាបុច្ឆា គហិតំ បុន បដិទាតព្ពចីវរន្តិ អត្ថោ.

៩០៦. អាបទាសូតិ សចេ អបារុតំ វា អនិវត្ថំ វា ចោរា ហរន្តិ, ឯវរូបាសុ អាបទាសុ ធារេន្តិយា អនាបត្តិ. សេសំ ឧត្តានមេវ. កថិនសមុដ្ឋានំ – កិរិយាកិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ.

បញ្ចមសិក្ខាបទំ.