២. ទុតិយសិក្ខាបទវណ្ណនា

៧៩៩. ទុតិយេ – សម្ពាធេតិ បដិច្ឆន្នោកាសេ. តស្ស វិភាគទស្សនត្ថំ បន ‘‘ឧភោ ឧបកច្ឆកា មុត្តករណ’’ន្តិ វុត្តំ. ឯកម្បិ លោមន្តិ កត្តរិយា វា សណ្ឌាសកេន វា ខុរេន វា យេន កេនចិ ឯកបយោគេន វា នានាបយោគេន វា ឯកំ វា ពហូនិ វា សំហរាបេន្តិយា បយោគគណនាយ បាចិត្តិយានិ, ន លោមគណនាយ.

៨០១. អាពាធបច្ចយាតិ កណ្ឌុកច្ឆុអាទិអាពាធបច្ចយា សំហរាបេន្តិយា អនាបត្តិ. សេសំ ឧត្តានមេវ. ចតុសមុដ្ឋានំ – កាយតោ កាយវាចតោ កាយចិត្តតោ កាយវាចាចិត្តតោ ច សមុដ្ឋាតិ, កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ.

ទុតិយសិក្ខាបទំ.