១. អាវសថបិណ្ឌសិក្ខាបទវណ្ណនា

២០៣. ភោជនវគ្គស្ស បឋមសិក្ខាបទេ – អាវសថបិណ្ឌោតិ អាវសថេ បិណ្ឌោ. សមន្តា បរិក្ខិត្តំ អទ្ធិកគិលានគព្ភិនិបព្ពជិតានំ យថានុរូបំ បញ្ញត្តមញ្ចបីឋំ អនេកគព្ភបមុខបរិច្ឆេទំ អាវសថំ កត្វា តត្ថ បុញ្ញកាមតាយ បិណ្ឌោ បញ្ញត្តោ ហោតិ, យាគុភត្តភេសជ្ជាទិ សព្ពំ តេសំ តេសំ ទានត្ថាយ ឋបិតំ ហោតីតិ អត្ថោ. ហិយ្យោបីតិ ស្វេបិ. អបសក្កន្តីតិ អបគច្ឆន្តិ. មនុស្សា ឧជ្ឈាយន្តីតិ តិត្ថិយេ អបស្សន្តា ‘‘តិត្ថិយា កុហិំ គតា’’‘‘ឥមេ បស្សិត្វា បក្កន្តា’’តិ សុត្វា ឧជ្ឈាយន្តិ. កុក្កុច្ចាយន្តោតិ កុក្កុច្ចំ ករោន្តោ, អកប្បិយសញ្ញំ ឧប្បាទេន្តោតិ អត្ថោ.

២០៦. សក្កោតិ តម្ហា អាវសថា បក្កមិតុន្តិ អទ្ធយោជនំ វា យោជនំ វា គន្តុំ សក្កោតិ. ន សក្កោតីតិ ឯត្តកមេវ ន សក្កោតិ. អនោទិស្សាតិ ឥមេសំយេវ វា ឯត្តកានំយេវ វាតិ ឯកំ បាសណ្ឌំ អនុទ្ទិសិត្វា សព្ពេសំ បញ្ញត្តោ ហោតិ. យាវទត្ថោតិ ភោជនម្បិ ឯត្តកន្តិ អបរិច្ឆិន្ទិត្វា យាវទត្ថោ បញ្ញត្តោ ហោតិ. សកិំ ភុញ្ជិតព្ពន្តិ ឯកទិវសំ ភុញ្ជិតព្ពំ, ទុតិយទិវសតោ បដ្ឋាយ បដិគ្គហណេ ទុក្កដំ, អជ្ឈោហារេ អជ្ឈោហារេ បាចិត្តិយំ.

អយំ បនេត្ថ វិនិច្ឆយោ – ឯកកុលេន វា នានាកុលេហិ វា ឯកតោ ហុត្វា ឯកស្មិំ ឋានេ វា នានាឋានេសុ វា ‘‘អជ្ជ ឯកស្មិំ; ស្វេ ឯកស្មិ’’ន្តិ ឯវំ អនិយមិតដ្ឋានេ វា បញ្ញត្តំ ឯកស្មិំ ឋានេ ឯកទិវសំ ភុញ្ជិត្វា ទុតិយទិវសេ តស្មិំ ឋានេ អញ្ញស្មិំ វា ភុញ្ជិតុំ ន វដ្ដតិ. នានាកុលេហិ បន នានាឋានេសុ បញ្ញត្តំ ឯកស្មិំ ឋានេ ឯកទិវសំ ភុញ្ជិត្វា ទុតិយទិវសេ អញ្ញត្ថ ភុញ្ជិតុំ វដ្ដតិ. បដិបាដិំ បន ខេបេត្វា បុន អាទិតោ បដ្ឋាយ ភុញ្ជិតុំ ន វដ្ដតីតិ មហាបច្ចរិយំ វុត្តំ. ឯកបូគនានាបូគឯកគាមនានាគាមេសុបិ ឯសេវ នយោ. យោបិ ឯកកុលស្ស វា នានាកុលានំ វា ឯកតោ បញ្ញត្តោ តណ្ឌុលាទីនំ អភាវេន អន្តរន្តរា ឆិជ្ជតិ, សោបិ ន ភុញ្ជិតព្ពោ. សចេ បន ‘‘ន សក្កោម ទាតុ’’ន្តិ ឧបច្ឆិន្ទិត្វា បុន កល្យាណចិត្តេ ឧប្បន្នេ ទាតុំ អារភន្តិ, ឯតំ បុន ឯកទិវសំ ភុញ្ជិតុំ វដ្ដតីតិ មហាបច្ចរិយំ វុត្តំ.

២០៨. អនាបត្តិ គិលានស្សាតិ គិលានស្ស អនុវសិត្វា ភុញ្ជន្តស្ស អនាបត្តិ. គច្ឆន្តោ វាតិ យោ គច្ឆន្តោ អន្តរាមគ្គេ ឯកទិវសំ គតដ្ឋានេ ច ឯកទិវសំ ភុញ្ជតិ, តស្សាបិ អនាបត្តិ. អាគច្ឆន្តេបិ ឯសេវ នយោ. គន្ត្វា បច្ចាគច្ឆន្តោបិ អន្តរាមគ្គេ ឯកទិវសំ អាគតដ្ឋានេ ច ឯកទិវសំ ភុញ្ជិតុំ លភតិ. គច្ឆិស្សាមីតិ ភុញ្ជិត្វា និក្ខន្តស្ស នទី វា បូរតិ ចោរាទិភយំ វា ហោតិ, សោ និវត្តិត្វា ខេមភាវំ ញត្វា គច្ឆន្តោ បុន ឯកទិវសំ ភុញ្ជិតុំ លភតីតិ សព្ពមិទំ មហាបច្ចរិយាទីសុ វុត្តំ. ឱទិស្ស បញ្ញត្តោ ហោតីតិ ភិក្ខូនំយេវ អត្ថាយ ឧទ្ទិសិត្វា បញ្ញត្តោ ហោតិ. ន យាវទត្ថោតិ យាវទត្ថំ បញ្ញត្តោ ន ហោតិ, ថោកំ ថោកំ លព្ភតិ, តាទិសំ និច្ចម្បិ ភុញ្ជិតុំ វដ្ដតិ. បញ្ច ភោជនានិ ឋបេត្វា សព្ពត្ថាតិ យាគុខជ្ជកផលាផលាទិភេទេ សព្ពត្ថ អនាបត្តិ. យាគុអាទីនិ ហិ និច្ចម្បិ ភុញ្ជិតុំ វដ្ដតិ. សេសំ ឧត្តានមេវ. ឯឡកលោមសមុដ្ឋានំ – កាយតោ ច កាយចិត្តតោ ច សមុដ្ឋាតិ, កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ តិចិត្តំ, តិវេទនន្តិ.

អាវសថបិណ្ឌសិក្ខាបទំ បឋមំ.