៧. សុទ្ធិកសុត្តវណ្ណនា

១៩៣. សត្តមេ សុទ្ធិកភារទ្វាជោតិ អយម្បិ ភារទ្វាជោវ, សុទ្ធិកបញ្ហស្ស បន បុច្ឆិតត្តា សង្គីតិការេហិ ឯវំ វុត្តោ. សីលវាបិ តបោករន្តិ សីលសម្បន្នោបិ តបោកម្មំ ករោន្តោ. វិជ្ជាចរណសម្បន្នោតិ ឯត្ថ វិជ្ជាតិ តយោ វេទា. ចរណន្តិ គោត្តចរណំ. សោ សុជ្ឈតិ ន អញ្ញា ឥតរា បជាតិ សោ តេវិជ្ជោ ព្រាហ្មណោ សុជ្ឈតិ, អយំ បន អញ្ញា នាមិកា បជា ន សុជ្ឈតីតិ វទតិ. ពហុម្បិ បលបំ ជប្បន្តិ ពហុម្បិ បលបំ ជប្បន្តោ, ‘‘ព្រាហ្មណោវ សុជ្ឈតី’’តិ ឯវំ វចនសហស្សម្បិ ភណន្តោតិ អត្ថោ. អន្តោកសម្ពូតិ អន្តោ កិលេសបូតិសភាវេន បូតិកោ. សំកិលិដ្ឋោតិ កិលិដ្ឋេហិ កាយកម្មាទីហិ សមន្នាគតោ. សត្តមំ.