៨. កិមិលត្ថេរគាថាវណ្ណនា

បាចីនវំសទាយម្ហីតិអាទិកា អាយស្មតោ កិមិលត្ថេរស្ស គាថា. កា ឧប្បត្តិ? តស្ស បុព្ពយោគោ សំវេគុប្បត្តិ បព្ពជ្ជា ច ឯកកនិបាតេ ‘‘អភិសត្តោ’’តិ គាថាយ សំវណ្ណនាយំ វុត្តាយេវ. តាយ ច គាថាយ ថេរេន អត្តនោ វិសេសាធិគមស្ស ការណំ ទស្សិតំ. ឥធ បន អធិគតវិសេសស្ស អត្តនោ អាយស្មតា ច អនុរុទ្ធេន អាយស្មតា ច នន្ទិយេន សហ សមគ្គវាសោ ទស្សិតោតិ វេទិតព្ពំ. សមគ្គវាសំ បន វសន្តា តេ យថា ច វសិំសុ, តំ ទស្សេន្តោ –

១៥៥. ‘‘បាចីនវំសទាយម្ហិ, សក្យបុត្តា សហាយកា;

បហាយានប្បកេ ភោគេ, ឧញ្ឆេ បត្តាគតេ រតា.

១៥៦. ‘‘អារទ្ធវីរិយា បហិតត្តា, និច្ចំ ទឡ្ហបរក្កមា;

រមន្តិ ធម្មរតិយា, ហិត្វាន លោកិយំ រតិ’’ន្តិ. – គាថាទ្វយំ អភាសិ;

តត្ថ បាចីនវំសទាយម្ហីតិ បាចីនវំសនាមកេ រក្ខិតគោបិតេ សហបរិច្ឆេទេ វនេ. តញ្ហិ វនំ គាមស្ស បាចីនទិសាយំ ឋិតត្តា វំសគុម្ពបរិក្ខិត្តត្តា ច ‘‘បាចីនវំសទាយោ’’តិ វុត្តោ, វំសវនភាវេន វាតិ. សក្យបុត្តាតិ អនុរុទ្ធត្ថេរាទយោ សក្យរាជកុមារា. សហាយកាតិ សំវេគុប្បត្តិបព្ពជ្ជាសមណធម្មករណសំវាសេហិ សហ អយនតោ បវត្តនតោ សហាយកា. បហាយានប្បកេ ភោគេតិ ឧឡារេន បុញ្ញានុភាវេន អធិគតេ កុលបរម្បរាគតេ ច មហន្តេ ភោគក្ខន្ធេ ឆឌ្ឌេត្វា. ‘‘សហាយានប្បកេ’’តិបិ បាឡិ. ឧញ្ឆេ បត្តាគតេ រតាតិ ឧញ្ឆាចរិយាយ អាភតត្តា ឧញ្ឆេ បត្តេ អាគតត្តា បត្តាគតេ បត្តបរិយាបន្នេ រតា អភិរតា, សង្ឃភត្តាទិអតិរេកលាភំ បដិក្ខិបិត្វា ជង្ឃពលំ និស្សាយ ភិក្ខាចរិយាយ លទ្ធេន មិស្សកភត្តេនេវ សន្តុដ្ឋាតិ អត្ថោ.

អារទ្ធវីរិយាតិ ឧត្តមត្ថស្ស អធិគមាយ អាទិតោវ បគេវ សម្បាទិតវីរិយា. បហិតត្តាតិ និន្នបោណបព្ភារភាវេន កាលេន កាលំ សមាបជ្ជនេន ច និព្ពានំ បតិបេសិតចិត្តា. និច្ចំ ទឡ្ហបរក្កមាតិ វត្តបដិបត្តីសុ ទិដ្ឋធម្មសុខវិហារានុយោគេន សព្ពកាលំ អសិថិលបរក្កមា. រមន្តិ ធម្មរតិយា, ហិត្វាន លោកិយំ រតិន្តិ លោកេ វិទិតតាយ លោកបរិយាបន្នតាយ ច លោកិយំ រូបារម្មណាទិរតិំ បហាយ មគ្គបញ្ញាយ បជហិត្វា លោកុត្តរធម្មរតិយា អគ្គផលនិព្ពានាភិរតិយា ច រមន្តិ អភិរមន្តីតិ.

កិមិលត្ថេរគាថាវណ្ណនា និដ្ឋិតា.