១០. គណបេតវត្ថុវណ្ណនា

នគ្គា ទុព្ពណ្ណរូបាត្ថាតិ ឥទំ សត្ថរិ ជេតវនេ វិហរន្តេ សម្ពហុលេ បេតេ អារព្ភ វុត្តំ. សាវត្ថិយំ កិរ សម្ពហុលា មនុស្សា គណភូតា អស្សទ្ធា អប្បសន្នា មច្ឆេរមលបរិយុដ្ឋិតចិត្តា ទានាទិសុចរិតវិមុខា ហុត្វា ចិរំ ជីវិត្វា កាយស្ស ភេទា នគរស្ស សមីបេ បេតយោនិយំ និព្ពត្តិំសុ. អថេកទិវសំ អាយស្មា មហាមោគ្គល្លានោ សាវត្ថិយំ បិណ្ឌាយ គច្ឆន្តោ អន្តរាមគ្គេ បេតេ ទិស្វា –

៧៨២. ‘‘នគ្គា ទុព្ពណរូបាត្ថ, កិសា ធមនិសន្ថតា;

ឧប្ផាសុលិកា កិសិកា, កេ នុ តុម្ហេត្ថ មារិសា’’តិ. –

គាថាយ បុច្ឆិ. តត្ថ ទុព្ពណ្ណរូបាត្ថាតិ ទុព្ពណ្ណសរីរា ហោថ. កេ នុ តុម្ហេត្ថាតិ តុម្ហេ កេ នុ នាម ភវថ. មារិសាតិ តេ អត្តនោ សារុប្បវសេន អាលបតិ.

តំ សុត្វា បេតា –

៧៨៣. ‘‘មយំ ភទន្តេ បេតម្ហា, ទុគ្គតា យមលោកិកា;

បាបកម្មំ ករិត្វាន, បេតលោកំ ឥតោ គតា’’តិ. –

គាថាយ អត្តនោ បេតភាវំ បកាសេត្វា បុន ថេរេន –

៧៨៤. ‘‘កិំ នុ កាយេន វាចាយ, មនសា ទុក្កដំ កតំ;

កិស្សកម្មវិបាកេន, បេតលោកំ ឥតោ គតា’’តិ. –

គាថាយ កតកម្មំ បុច្ឆិតា –

៧៨៥. ‘‘អនាវដេសុ តិត្ថេសុ, វិចិនិម្ហទ្ធមាសកំ;

សន្តេសុ ទេយ្យធម្មេសុ, ទីបំ នាកម្ហ អត្តនោ.

៧៨៦. ‘‘នទិំ ឧបេម តសិតា, រិត្តកា បរិវត្តតិ;

ឆាយំ ឧបេម ឧណ្ហេសុ, អាតបោ បរិវត្តតិ.

៧៨៧. ‘‘អគ្គិវណ្ណោ ច នោ វាតោ, ឌហន្តោ ឧបវាយតិ;

ឯតញ្ច ភន្តេ អរហាម, អញ្ញញ្ច បាបកំ តតោ.

៧៨៨. ‘‘អបិ យោជនានិ គច្ឆាម, ឆាតា អាហារគេធិនោ;

អលទ្ធាវ និវត្តាម, អហោ នោ អប្បបុញ្ញតា.

៧៨៩. ‘‘ឆាតា បមុច្ឆិតា ភន្តា, ភូមិយំ បដិសុម្ភិតា;

ឧត្តានា បដិកិរាម, អវកុជ្ជា បតាមសេ.

៧៩០. ‘‘តេ ច តត្ថេវ បតិតា, ភូមិយំ បដិសុម្ភិតា;

ឧរំ សីសញ្ច ឃដ្ដេម, អហោ នោ អប្បបុញ្ញតា.

៧៩១. ‘‘ឯតញ្ច ភន្តេ អរហាម, អញ្ញញ្ច បាបកំ តតោ;

សន្តេសុ ទេយ្យធម្មេសុ, ទីបំ នាកម្ហ អត្តនោ.

៧៩២. ‘‘តេ ហិ នូន ឥតោ គន្ត្វា, យោនិំ លទ្ធាន មានុសិំ;

វទញ្ញូ សីលសម្បន្នា, កាហាម កុសលំ ពហុ’’ន្តិ. –

អត្តនា កតកម្មំ កថេសុំ.

៧៨៨. តត្ថ អបិ យោជនានិ គច្ឆាមាតិ អនេកានិបិ យោជនានិ គច្ឆាម. កថំ? ឆាតា អាហារគេធិនោតិ, ចិរកាលំ ជិឃច្ឆាយ ជិឃច្ឆិតា អាហារេ គិទ្ធា អភិគិជ្ឈន្តា ហុត្វា, ឯវំ គន្ត្វាបិ កិញ្ចិ អាហារំ អលទ្ធាយេវ និវត្តាម. អប្បបុញ្ញតាតិ អបុញ្ញតា អកតកល្យាណតា.

៧៨៩. ឧត្តានា បដិកិរាមាតិ កទាចិ ឧត្តានា ហុត្វា វិកិរិយមានង្គបច្ចង្គា វិយ វត្តាម. អវកុជ្ជា បតាមសេតិ កទាចិ អវកុជ្ជា ហុត្វា បតាម.

៧៩០. តេ ចាតិ តេ មយំ. ឧរំ សីសញ្ច ឃដ្ដេមាតិ អវកុជ្ជា ហុត្វា បតិតា ឧដ្ឋាតុំ អសក្កោន្តា វេធន្តា វេទនាប្បត្តា អត្តនោ អត្តនោ ឧរំ សីសញ្ច បដិឃំសាម. សេសំ ហេដ្ឋា វុត្តនយមេវ.

ថេរោ តំ បវត្តិំ ភគវតោ អារោចេសិ. ភគវា តមត្ថំ អដ្ឋុប្បត្តិំ កត្វា សម្បត្តបរិសាយ ធម្មំ ទេសេសិ. តំ សុត្វា មហាជនោ មច្ឆេរមលំ បហាយ ទានាទិសុចរិតនិរតោ អហោសីតិ.

គណបេតវត្ថុវណ្ណនា និដ្ឋិតា.