៩. អបរន្តានុទិដ្ឋិនិទ្ទេសវណ្ណនា

១៤២. សញ្ញិំ វទន្តីតិ សញ្ញីវាទា. អសញ្ញិំ វទន្តីតិ អសញ្ញីវាទា. នេវសញ្ញីនាសញ្ញិំ វទន្តីតិ នេវសញ្ញីនាសញ្ញីវាទា. អថ វា សញ្ញីតិ បវត្តោ វាទោ សញ្ញីវាទោ, សោ យេសំ អត្ថីតិ តេ សញ្ញីវាទា, តថា អសញ្ញីវាទា, នេវសញ្ញីនាសញ្ញីវាទា ច. ឧច្ឆេទំ វទន្តីតិ ឧច្ឆេទវាទា. ទិដ្ឋធម្មោតិ បច្ចក្ខធម្មោ, តត្ថ តត្ថ បដិលទ្ធអត្តភាវស្សេតំ អធិវចនំ. ទិដ្ឋធម្មេ និព្ពានំ ទិដ្ឋធម្មនិព្ពានំ, ឥមស្មិំយេវ អត្តភាវេ ទុក្ខវូបសមោតិ អត្ថោ, តំ វទន្តីតិ ទិដ្ឋធម្មនិព្ពានវាទា. ឥមស្មិំ បនត្ថេ វិត្ថារិយមានេ សាដ្ឋកថំ សកលំ ព្រហ្មជាលសុត្តំ វត្តព្ពំ ហោតិ. ឯវញ្ច សតិ អតិបបញ្ចោ ហោតីតិ ន វិត្ថារិតោ. តទត្ថិកេហិ តំ អបេក្ខិត្វា គហេតព្ពោ.

អបរន្តានុទិដ្ឋិនិទ្ទេសវណ្ណនា និដ្ឋិតា.