៣. មិច្ឆាទិដ្ឋិនិទ្ទេសវណ្ណនា

១៣៦. មិច្ឆាទិដ្ឋិ ហេដ្ឋា វុត្តត្ថាយេវ. អយំ បន អបរោ នយោ – នត្ថិ ទិន្នន្តិ ឧច្ឆេទទិដ្ឋិកត្តា ទានផលំ បដិក្ខិបតិ. នត្ថិ យិដ្ឋន្តិ ឯត្ថ យិដ្ឋន្តិ ខុទ្ទកយញ្ញោ. ហុតន្តិ មហាយញ្ញោ. ទ្វិន្នម្បិ ផលំ បដិក្ខិបតិ. នត្ថិ សុកតទុក្កដានំ កម្មានំ ផលំ វិបាកោតិ ទានផលស្ស បដិក្ខិត្តត្តា សីលាទីនំ បុញ្ញកម្មានំ, បាណាតិបាតាទីនំ បាបកម្មានំ ផលំ បដិក្ខិបតិ. នត្ថិ អយំ លោកោតិ បុរេ កតេន កម្មុនា. នត្ថិ បរោ លោកោតិ ឥធ កតេន កម្មុនា. នត្ថិ មាតា, នត្ថិ បិតាតិ តេសុ កតកម្មានំ ផលំ បដិក្ខិបតិ. នត្ថិ សត្តា ឱបបាតិកាតិ កម្មហេតុកំ ឧបបត្តិំ បដិក្ខិបតិ. នត្ថិ លោកេ សមណព្រាហ្មណា…បេ… បវេទេន្តីតិ ឥធលោកបរលោកេ បស្សិតុំ អភិញ្ញាបដិលាភាយ បដិបទំ បដិក្ខិបតិ. ឥធ បាឡិយំ បន នត្ថិ ទិន្នន្តិ វត្ថូតិ នត្ថិ ទិន្នន្តិ វុច្ចមានំ ទានំ, តស្សា ទិដ្ឋិយា វត្ថូតិ អត្ថោ. ឯវំវាទោ មិច្ឆាតិ ឯវំ នត្ថិ ទិន្នន្តិ វាទោ វចនំ មិច្ឆា វិបរីតោតិ អត្ថោ.

មិច្ឆាទិដ្ឋិនិទ្ទេសវណ្ណនា និដ្ឋិតា.