៣៩. អត្ថសន្ទស្សនញាណនិទ្ទេសវណ្ណនា

៩០. អត្ថសន្ទស្សនញាណនិទ្ទេសេ បញ្ចក្ខន្ធាតិអាទីនិ វុត្តត្ថានេវ. បកាសេតីតិ បាកដំ ករោតិ, សោតូនំ ញាណចក្ខុនា ទស្សនំ សម្បាទេតីតិ អត្ថោ. នានាធម្មាតិ លោកិយលោកុត្តរា សព្ពធម្មា វុត្តា. កស្មា បកាសនានិទ្ទេសេ លោកិយា ឯវ វុត្តាតិ ចេ? អនិច្ចាទិវសេន បកាសនាយ អារទ្ធត្តា. លោកុត្តរានញ្ច អសម្មសនូបគត្តា លោកុត្តរា ន វុត្តា. នានាធម្មនិទ្ទេសេន បន អត្ថសន្ទស្សននិទ្ទេសេន ច តេសំ សង្គហិតត្តា យថា តេ បកាសេតព្ពា, តថា បកាសនា បកាសនាយេវ. បជហន្តោតិ សោតារំ បជហាបេន្តោតិ អត្ថោ. សន្ទស្សេតីតិ សោតូនំ សម្មា ទស្សេតិ. កេចិ បន ‘‘កាមច្ឆន្ទស្ស បហីនត្តា នេក្ខម្មត្ថំ សន្ទស្សេតី’’តិអាទិនា នយេន បឋន្តិ. តេសំ ឧជុកមេវ សោតូនំ ទោសប្បហានេ គុណបដិលាភេ ច កតេ សិខាប្បត្តំ ទេសនាញាណំ ហោតីតិ ទស្សនត្ថំ អយំ នយោ វុត្តោតិ វេទិតព្ពោ.

អត្ថសន្ទស្សនញាណនិទ្ទេសវណ្ណនា និដ្ឋិតា.