៧. កាមយោគសុត្តវណ្ណនា

៩៦. សត្តមេ កាមយោគយុត្តោតិ បញ្ចកាមគុណិកោ រាគោ កាមយោគោ, តេន យុត្តោ កាមយោគយុត្តោ, អសមុច្ឆិន្នកាមរាគស្សេតំ អធិវចនំ. រូបារូបភវេសុ ឆន្ទរាគោ ភវយោគោ, តថា ឈាននិកន្តិ សស្សតទិដ្ឋិសហគតោ ច រាគោ, តេន យុត្តោ ភវយោគយុត្តោ, អប្បហីនភវរាគោតិ អត្ថោ. អាគាមីតិ ព្រហ្មលោកេ ឋិតោបិ បដិសន្ធិគ្គហណវសេន ឥមំ មនុស្សលោកំ អាគមនសីលោ. តេនេវាហ ‘‘អាគន្តា ឥត្ថត្ត’’ន្តិ. មនុស្សត្តភាវសង្ខាតំ ឥត្ថភាវំ អាគមនធម្មោ, មនុស្សេសុ ឧបបជ្ជនសីលោតិ អត្ថោ. កាមញ្ចេត្ថ កាមយោគោ ឥត្ថត្តំ អាគមនស្ស ការណំ. យោ បន កាមយោគយុត្តោ, សោ ឯកន្តេន ភវយោគយុត្តោបិ ហោតីតិ ទស្សនត្ថំ ‘‘កាមយោគយុត្តោ, ភិក្ខវេ, ភវយោគយុត្តោ’’តិ ឧភយម្បិ ឯកជ្ឈំ កត្វា វុត្តំ.

កាមយោគវិសំយុត្តោតិ ឯត្ថ អសុភជ្ឈានម្បិ កាមយោគវិសំយោគោ, តំ បាទកំ កត្វា អធិគតោ អនាគាមិមគ្គោ ឯកន្តេនេវ កាមយោគវិសំយោគោ នាម, តស្មា តតិយមគ្គផលេ ឋិតោ អរិយបុគ្គលោ ‘‘កាមយោគវិសំយុត្តោ’’តិ វុត្តោ. យស្មា បន រូបារូបភវេសុ ឆន្ទរាគោ អនាគាមិមគ្គេន ន បហីយតិ, តស្មា សោ អប្បហីនភវយោគត្តា ‘‘ភវយោគយុត្តោ’’តិ វុត្តោ. អនាគាមីតិ កាមលោកំ បដិសន្ធិគ្គហណវសេន អនាគមនតោ អនាគាមី. កាមយោគវិសំយោគវសេនេវ ហិ សទ្ធិំ អនវសេសឱរម្ភាគិយសំយោជនសមុគ្ឃាតេន អជ្ឈត្តសំយោជនាភាវសិទ្ធិតោ ឥត្ថត្តំ អនាគន្ត្វា ហោតិ, តត្ថ បរិនិព្ពាយី អនាវត្តិធម្មោ. យស្ស បន អនវសេសំ ភវយោគោ បហីនោ, តស្ស អវិជ្ជាយោគាទិអវសិដ្ឋកិលេសាបិ តទេកដ្ឋភាវតោ បហីនា ឯវ ហោន្តីតិ, សោ បរិក្ខីណភវសំយោជនោ ‘‘អរហំ ខីណាសវោ’’តិ វុច្ចតិ. តេន វុត្តំ ‘‘កាមយោគវិសំយុត្តោ, ភិក្ខវេ, ភវយោគវិសំយុត្តោ អរហំ ហោតិ ខីណាសវោ’’តិ. ឯត្ថ ច កាមយោគវិសំយោគោ អនាគាមី ចតុត្ថជ្ឈានស្ស សុខទុក្ខសោមនស្សទោមនស្សប្បហានំ វិយ, តតិយមគ្គស្ស ទិដ្ឋិវិចិកិច្ឆាសីលព្ពតបរាមាសសំយោជនបរិក្ខយោ វិយ ច ចតុត្ថមគ្គស្ស វណ្ណភណនត្ថំ វុត្តោតិ ទដ្ឋព្ពំ. បឋមបទេន សោតាបន្នសកទាគាមីហិ សទ្ធិំ សព្ពោ បុថុជ្ជនោ គហិតោ, ទុតិយបទេន បន សព្ពោ អនាគាមី, តតិយបទេន អរហាតិ អរហត្តនិកូដេន ទេសនំ និដ្ឋាបេសិ.

គាថាសុ ឧភយន្តិ ឧភយេន, កាមយោគេន, ភវយោគេន ច សំយុត្តាតិ អត្ថោ. សត្តា គច្ឆន្តិ សំសារន្តិ បុថុជ្ជនា សោតាបន្នា សកទាគាមិនោតិ ឥមេ តិវិធា សត្តា កាមយោគភវយោគានំ អប្បហីនត្តា គច្ឆន្តិ សំសារន្តិ. តតោ ឯវ ជាតិមរណគាមិនោ ហោន្តិ. ឯត្ថ ឯកពីជី, កោលំកោលោ, សត្តក្ខត្តុបរមោតិ តីសុ សោតាបន្នេសុ សព្ពមុទុ សត្តក្ខត្តុបរមោ, សោ អដ្ឋមំ ភវំ ន និព្ពត្តេតិ, អត្តនោ បរិច្ឆិន្នជាតិវសេន បន សំសរតិ, តថា ឥតរេបិ. សកទាគាមីសុបិ យោ ឥធ សកទាគាមិមគ្គំ បត្វា ទេវលោកេ ឧប្បជ្ជិត្វា បុន ឥធ និព្ពត្តតិ, សោ អត្តនោ បរិច្ឆិន្នជាតិវសេនេវ សំសរតិ. យេ បន សកទាគាមិនោ វោមិស្សកនយេន វិនា តត្ថ តត្ថ ទេវេសុយេវ មនុស្សេសុយេវ វា និព្ពត្តន្តិ, តេ ឧបរិមគ្គាធិគមាយ យាវ ឥន្ទ្រិយបរិបាកា បុនប្បុនំ ឧប្បជ្ជនតោ សំសរន្តិយេវ. បុថុជ្ជនេ បន វត្តព្ពមេវ នត្ថិ សព្ពភវសំយោជនានំ អបរិក្ខីណត្តា. តេន វុត្តំ –

‘‘កាមយោគេន សំយុត្តា, ភវយោគេន ចូភយំ;

សត្តា គច្ឆន្តិ សំសារំ, ជាតិមរណគាមិនោ’’តិ.

កាមេ បហន្ត្វានាតិ កាមរាគសង្ខាតេ កិលេសកាមេ អនាគាមិមគ្គេន បជហិត្វា. ឆិន្នសំសយាតិ សមុច្ឆិន្នកង្ខា, តញ្ច ខោ សោតាបត្តិមគ្គេនេវ. វណ្ណភណនត្ថំ បន ចតុត្ថមគ្គស្ស ឯវំ វុត្តំ. អរហន្តោ ហិ ឥធ ‘‘ឆិន្នសំសយា’’តិ អធិប្បេតា. តេនេវាហ ‘‘ខីណមានបុនព្ភវា’’តិ. សព្ពសោ ខីណោ នវវិធោបិ មានោ អាយតិំ បុនព្ភវោ ច ឯតេសន្តិ ខីណមានបុនព្ភវា. មានគ្គហណេន ចេត្ថ តទេកដ្ឋតាយ លក្ខណវសេន វា សព្ពោ ចតុត្ថមគ្គវជ្ឈោ កិលេសោ គហិតោតិ. ខីណមានតាយ ច សឧបាទិសេសា និព្ពានធាតុ វុត្តា ហោតិ, ខីណបុនព្ភវតាយ អនុបាទិសេសា. សេសំ សុវិញ្ញេយ្យមេវ.

សត្តមសុត្តវណ្ណនា និដ្ឋិតា.