៤. អញ្ញតរព្រាហ្មណវត្ថុ

ឈាយិន្តិ ឥមំ ធម្មទេសនំ សត្ថា ជេតវនេ វិហរន្តោ អញ្ញតរំ ព្រាហ្មណំ អារព្ភ កថេសិ.

សោ កិរ ចិន្តេសិ – ‘‘សត្ថា អត្តនោ សាវកេ, ‘ព្រាហ្មណា’តិ វទតិ, អហញ្ចម្ហិ ជាតិគោត្តេន ព្រាហ្មណោ, មម្បិ នុ ខោ ឯវំ វត្តុំ វដ្ដតី’’តិ. សោ សត្ថារំ ឧបសង្កមិត្វា តមត្ថំ បុច្ឆិ. សត្ថា ‘‘នាហំ ជាតិគោត្តមត្តេន ព្រាហ្មណំ វទាមិ, ឧត្តមត្ថំ អរហត្តំ អនុប្បត្តមេវ បនេវំ វទាមី’’តិ វត្វា ឥមំ គាថមាហ –

៣៨៦. ‘‘ឈាយិំ វិរជមាសីនំ, កតកិច្ចមនាសវំ;

ឧត្តមត្ថមនុប្បត្តំ, តមហំ ព្រូមិ ព្រាហ្មណ’’ន្តិ.

តត្ថ ឈាយិន្តិ ទុវិធេន ឈានេន ឈាយន្តំ កាមរជេន វិរជំ វនេ ឯកកមាសីនំ ចតូហិ មគ្គេហិ សោឡសន្នំ កិច្ចានំ កតត្តា កតកិច្ចំ អាសវានំ អភាវេន អនាសវំ ឧត្តមត្ថំ អរហត្តំ អនុប្បត្តំ អហំ ព្រាហ្មណំ វទាមីតិ អត្ថោ.

ទេសនាវសានេ សោ ព្រាហ្មណោ សោតាបត្តិផលេ បតិដ្ឋហិ, សម្បត្តានម្បិ សាត្ថិកា ធម្មទេសនា អហោសីតិ.

អញ្ញតរព្រាហ្មណវត្ថុ ចតុត្ថំ.