៥. អានន្ទត្ថេរវត្ថុ

ទិវា តបតីតិ ឥមំ ធម្មទេសនំ សត្ថា មិគារមាតុបាសាទេ វិហរន្តោ អានន្ទត្ថេរំ អារព្ភ កថេសិ.

បសេនទិ កោសលោ កិរ មហាបវារណាយ សព្ពាភរណបដិមណ្ឌិតោ គន្ធមាលាទីនិ អាទាយ វិហារំ អគមាសិ. តស្មិំ ខណេ កាឡុទាយិត្ថេរោ ឈានំ សមាបជ្ជិត្វា បរិសបរិយន្តេ និសិន្នោ ហោតិ, នាមមេវ បនស្សេតំ, សរីរំ សុវណ្ណវណ្ណំ. តស្មិំ បន ខណេ ចន្ទោ ឧគ្គច្ឆតិ, សូរិយោ អត្ថមេតិ. អានន្ទត្ថេរោ អត្ថមេន្តស្ស ច សូរិយស្ស ឧគ្គច្ឆន្តស្ស ច ចន្ទស្ស ឱភាសំ ឱលោកេន្តោ រញ្ញោ សរីរោភាសំ ថេរស្ស សរីរោភាសំ តថាគតស្ស ច សរីរោភាសំ ឱលោកេសិ. តត្ថ សព្ពោភាសេ អតិក្កមិត្វា សត្ថាវ វិរោចតិ. ថេរោ សត្ថារំ វន្ទិត្វា, ‘‘ភន្តេ, អជ្ជ មម ឥមេ ឱភាសេ ឱលោកេន្តស្ស តុម្ហាកមេវ ឱភាសោ រុច្ចតិ. តុម្ហាកញ្ហិ សរីរំ សព្ពោភាសេ អតិក្កមិត្វា វិរោចតី’’តិ អាហ. អថ នំ សត្ថា, ‘‘អានន្ទ, សូរិយោ នាម ទិវា វិរោចតិ, ចន្ទោ រត្តិំ, រាជា អលង្កតកាលេយេវ, ខីណាសវេ គណសង្គណិកំ បហាយ អន្តោសមាបត្តិយំយេវ វិរោចតិ, ពុទ្ធា បន រត្តិម្បិ ទិវាបិ បញ្ចវិធេន តេជេន វិរោចន្តី’’តិ វត្វា ឥមំ គាថមាហ –

៣៨៧. ‘‘ទិវា តបតិ អាទិច្ចោ, រត្តិមាភាតិ ចន្ទិមា;

សន្នទ្ធោ ខត្តិយោ តបតិ, ឈាយី តបតិ ព្រាហ្មណោ;

អថ សព្ពមហោរត្តិំ, ពុទ្ធោ តបតិ តេជសា’’តិ.

តត្ថ ទិវា តបតីតិ ទិវា វិរោចតិ, រត្តិំ បនស្ស គតមគ្គោបិ ន បញ្ញាយតិ. ចន្ទិមាតិ ចន្ទោបិ អព្ភាទីហិ វិមុត្តោ រត្តិមេវ វិរោចតិ, នោ ទិវា. សន្នទ្ធោតិ សុវណ្ណមណិវិចិត្តេហិ សព្ពាភរណេហិ បដិមណ្ឌិតោ ចតុរង្គិនិយា សេនាយ បរិក្ខិត្តោវ រាជា វិរោចតិ, ន អញ្ញាតកវេសេន ឋិតោ. ឈាយីតិ ខីណាសវោ បន គណំ វិនោទេត្វា ឈាយន្តោវ វិរោចតិ. តេជសាតិ សម្មាសម្ពុទ្ធោ បន សីលតេជេន ទុស្សីល្យតេជំ, គុណតេជេន និគ្គុណតេជំ, បញ្ញាតេជេន ទុប្បញ្ញតេជំ, បុញ្ញតេជេន អបុញ្ញតេជំ, ធម្មតេជេន អធម្មតេជំ បរិយាទិយិត្វា ឥមិនា បញ្ចវិធេន តេជសា និច្ចកាលមេវ វិរោចតីតិ អត្ថោ.

ទេសនាវសានេ ពហូ សោតាបត្តិផលាទីនិ បាបុណិំសូតិ.

អានន្ទត្ថេរវត្ថុ បញ្ចមំ.