៣១. សីវលិត្ថេរវត្ថុ

យោ ឥមន្តិ ឥមំ ធម្មទេសនំ សត្ថា កុណ្ឌកោលិយំ និស្សាយ កុណ្ឌធានវនេ វិហរន្តោ សីវលិត្ថេរំ អារព្ភ កថេសិ.

ឯកស្មិញ្ហិ សមយេ សុប្បវាសា នាម កោលិយធីតា សត្តវស្សានិ គព្ភំ ធារេត្វា សត្តាហំ មូឡ្ហគព្ភា ទុក្ខាហិ តិព្ពាហិ កដុកាហិ វេទនាហិ ផុដ្ឋា ‘‘សម្មាសម្ពុទ្ធោ វត សោ ភគវា, យោ ឥមស្ស ឯវរូបស្ស ទុក្ខស្ស បហានាយ ធម្មំ ទេសេតិ. សុប្បដិបន្នោ វត តស្ស ភគវតោ សាវកសង្ឃោ, យោ ឥមស្ស ឯវរូបស្ស ទុក្ខស្ស បហានាយ បដិបន្នោ. សុសុខំ វត តំ និព្ពានំ, យថិទំ ឯវរូបំ ទុក្ខំ ន សំវិជ្ជតី’’តិ (ឧទា. ១៨) ឥមេហិ តីហិ វិតក្កេហិ តំ ទុក្ខំ អធិវាសេន្តី សាមិកំ សត្ថុ សន្តិកំ បេសេត្វា តេន តស្សា វចនេន សត្ថុ វន្ទនាយ អារោចិតាយ ‘‘សុខិនី ហោតុ សុប្បវាសា កោលិយធីតា, អរោគា អរោគំ បុត្តំ វិជាយតូ’’តិ សត្ថារា វុត្តក្ខណេយេវ សុខិនី អរោគា អរោគំ បុត្តំ វិជាយិត្វា ពុទ្ធប្បមុខំ ភិក្ខុសង្ឃំ និមន្តេត្វា សត្តាហំ មហាទានំ អទាសិ. បុត្តោបិស្សា ជាតទិវសតោ បដ្ឋាយ ធម្មករណំ អាទាយ សង្ឃស្ស ឧទកំ បរិស្សាវេសិ. សោ អបរភាគេ និក្ខមិត្វា បព្ពជិតោ អរហត្តំ បាបុណិ.

អថេកទិវសំ ភិក្ខូ ធម្មសភាយំ កថំ សមុដ្ឋាបេសុំ ‘‘បស្សថាវុសោ, ឯវរូបោ នាម អរហត្តស្ស ឧបនិស្សយសម្បន្នោ ភិក្ខុ ឯត្តកំ កាលំ មាតុកុច្ឆិស្មិំ ទុក្ខំ អនុភោសិ, កិមង្គំ បន អញ្ញេ, ពហុំ វត ឥមិនា ទុក្ខំ និត្ថិណ្ណ’’ន្តិ. សត្ថា អាគន្ត្វា ‘‘កាយ នុត្ថ, ភិក្ខវេ, ឯតរហិ កថាយ សន្និសិន្នា’’តិ បុច្ឆិត្វា ‘‘ឥមាយ នាមា’’តិ វុត្តេ ‘‘អាម, ភិក្ខវេ, មម បុត្តោ ឯត្តកា ទុក្ខា មុច្ចិត្វា ឥទានិ និព្ពានំ សច្ឆិកត្វា វិហរតី’’តិ វត្វា ឥមំ គាថមាហ –

៤១៤. ‘‘យោមំ បលិបថំ ទុគ្គំ, សំសារំ មោហមច្ចគា;

តិណ្ណោ បារង្គតោ ឈាយី, អនេជោ អកថំកថី;

អនុបាទាយ និព្ពុតោ, តមហំ ព្រូមិ ព្រាហ្មណ’’ន្តិ.

តស្សត្ថោ – យោ ភិក្ខុ ឥមំ រាគបលិបថញ្ចេវ កិលេសទុគ្គញ្ច សំសារវដ្ដញ្ច ចតុន្នំ អរិយសច្ចានំ អប្បដិវិជ្ឈនកមោហញ្ច អតីតោ, ចត្តារោ ឱឃេ តិណ្ណោ ហុត្វា បារំ អនុប្បត្តោ, ទុវិធេន ឈានេន ឈាយី, តណ្ហាយ អភាវេន អនេជោ, កថំកថាយ អភាវេន អកថំកថី, ឧបាទានានំ អភាវេន អនុបាទិយិត្វា កិលេសនិព្ពានេន និព្ពុតោ, តមហំ ព្រាហ្មណំ វទាមីតិ អត្ថោ.

ទេសនាវសានេ ពហូ សោតាបត្តិផលាទីនិ បាបុណិំសូតិ.

សីវលិត្ថេរវត្ថុ ឯកតិំសតិមំ.