៣. មារវត្ថុ

យស្ស បារន្តិ ឥមំ ធម្មទេសនំ សត្ថា ជេតវនេ វិហរន្តោ មារំ អារព្ភ កថេសិ.

សោ កិរេកស្មិំ ទិវសេ អញ្ញតរោ បុរិសោ វិយ ហុត្វា សត្ថារំ ឧបសង្កមិត្វា បុច្ឆិ – ‘‘ភន្តេ, បារំ បារន្តិ វុច្ចតិ, កិន្នុ ខោ ឯតំ បារំ នាមា’’តិ. សត្ថា ‘‘មារោ អយ’’ន្តិ វិទិត្វា, ‘‘បាបិម, កិំ តវ បារេន, តញ្ហិ វីតរាគេហិ បត្តព្ព’’ន្តិ វត្វា ឥមំ គាថមាហ –

៣៨៥. ‘‘យស្ស បារំ អបារំ វា, បារាបារំ ន វិជ្ជតិ;

វីតទ្ទរំ វិសំយុត្តំ, តមហំ ព្រូមិ ព្រាហ្មណ’’ន្តិ.

តត្ថ បារន្តិ អជ្ឈត្តិកានិ ឆ អាយតនានិ. អបារន្តិ ពាហិរានិ ឆ អាយតនានិ. បារាបារន្តិ តទុភយំ. ន វិជ្ជតីតិ យស្ស សព្ពម្បេតំ ‘‘អហ’’ន្តិ វា ‘‘មម’’ន្តិ វា គហណាភាវេន នត្ថិ, តំ កិលេសទរថានំ វិគមេន វីតទ្ទរំ សព្ពកិលេសេហិ វិសំយុត្តំ អហំ ព្រាហ្មណំ វទាមីតិ អត្ថោ.

ទេសនាវសានេ ពហូ សោតាបត្តិផលាទីនិ បាបុណិំសូតិ.

មារវត្ថុ តតិយំ.