២៩. រេវតត្ថេរវត្ថុ

យោធ បុញ្ញញ្ចាតិ ឥមំ ធម្មទេសនំ សត្ថា បុព្ពារាមេ វិហរន្តោ រេវតត្ថេរំ អារព្ភ កថេសិ. វត្ថុ ‘‘គាមេ វា យទិ វារញ្ញេ’’តិ (ធ. ប. ៩៨) គាថាវណ្ណនាយ វិត្ថារិតមេវ. វុត្តញ្ហិ តត្ថ (ធ. ប. អដ្ឋ. ១.៩៨) –

បុន ឯកទិវសំ ភិក្ខូ កថំ សមុដ្ឋាបេសុំ ‘‘អហោ សាមណេរស្ស លាភោ, អហោ បុញ្ញំ, យេន ឯកកេន បញ្ចន្នំ ភិក្ខុសតានំ បញ្ចកូដាគារសតានិ កតានី’’តិ. សត្ថា អាគន្ត្វា ‘‘កាយ នុត្ថ, ភិក្ខវេ, ឯតរហិ កថាយ សន្និសិន្នា’’តិ បុច្ឆិត្វា ‘‘ឥមាយ នាមា’’តិ វុត្តេ, ‘‘ភិក្ខវេ, មយ្ហំ បុត្តស្ស នេវ បុញ្ញំ អត្ថិ, ន បាបំ, ឧភយមស្ស បហីន’’ន្តិ វត្វា ឥមំ គាថមាហ –

៤១២. ‘‘យោធ បុញ្ញញ្ច បាបញ្ច, ឧភោ សង្គមុបច្ចគា;

អសោកំ វិរជំ សុទ្ធំ, តមហំ ព្រូមិ ព្រាហ្មណ’’ន្តិ.

តត្ថ ឧភោតិ ទ្វេបិ បុញ្ញានិ ច បាបានិ ច ឆឌ្ឌេត្វាតិ អត្ថោ. សង្គន្តិ រាគាទិភេទំ សង្គំ. ឧបច្ចគាតិ អតិក្កន្តោ. វដ្ដមូលកសោកាភាវេន អសោកំ អព្ភន្តរេ រាគរជាទីនំ អភាវេន វិរជំ និរុបក្កិលេសតាយ សុទ្ធំ តមហំ ព្រាហ្មណំ វទាមីតិ អត្ថោ.

ទេសនាវសានេ ពហូ សោតាបត្តិផលាទីនិ បាបុណិំសូតិ.

រេវតត្ថេរវត្ថុ ឯកូនតិំសតិមំ.