២៦. អញ្ញតរត្ថេរវត្ថុ

យោធ ទីឃន្តិ ឥមំ ធម្មទេសនំ សត្ថា ជេតវនេ វិហរន្តោ អញ្ញតរត្ថេរំ អារព្ភ កថេសិ.

សាវត្ថិយំ កិរេកោ មិច្ឆាទិដ្ឋិកោ ព្រាហ្មណោ សរីរគន្ធគហណភយេន ឧត្តរសាដកំ អបនេត្វា ឯកមន្តេ ឋបេត្វា គេហទ្វារាភិមុខោ និសីទិ. អថេកោ ខីណាសវោ ភត្តកិច្ចំ កត្វា វិហារំ គច្ឆន្តោ តំ សាដកំ ទិស្វា ឥតោ ចិតោ ច ឱលោកេត្វា កញ្ចិ អបស្សន្តោ ‘‘និស្សាមិកោ អយ’’ន្តិ បំសុកូលំ អធិដ្ឋហិត្វា គណ្ហិ. អថ នំ ព្រាហ្មណោ ទិស្វា អក្កោសន្តោ ឧបសង្កមិត្វា ‘‘មុណ្ឌក, សមណ, មម សាដកំ គណ្ហសី’’តិ អាហ. តវេសោ, ព្រាហ្មណាតិ. អាម, សមណាតិ. ‘‘មយា កញ្ចិ អបស្សន្តេន បំសុកូលសញ្ញាយ គហិតោ, គណ្ហ ន’’ន្តិ តស្ស ទត្វា វិហារំ គន្ត្វា ភិក្ខូនំ តមត្ថំ អារោចេសិ. អថស្ស វចនំ សុត្វា ភិក្ខូ តេន សទ្ធិំ កេឡិំ ករោន្តា ‘‘កិំ នុ ខោ, អាវុសោ, សាដកោ ទីឃោ រស្សោ ថូលោ សណ្ហោ’’តិ. អាវុសោ, ទីឃោ វា ហោតុ រស្សោ វា ថូលោ វា សណ្ហោ វា, នត្ថិ មយ្ហំ តស្មិំ អាលយោ, បំសុកូលសញ្ញាយ នំ គណ្ហិន្តិ. តំ សុត្វា ភិក្ខូ តថាគតស្ស អារោចេសុំ – ‘‘ឯស, ភន្តេ, ភិក្ខុ អភូតំ វត្វា អញ្ញំ ព្យាករោតី’’តិ. សត្ថា ‘‘ភូតំ, ភិក្ខវេ, ឯស កថេតិ, ខីណាសវា នាម បរេសំ សន្តកំ ន គណ្ហន្តី’’តិ វត្វា ឥមំ គាថមាហ –

៤០៩. ‘‘យោធ ទីឃំ វ រស្សំ វា, អណុំ ថូលំ សុភាសុភំ;

លោកេ អទិន្នំ នាទិយតិ, តមហំ ព្រូមិ ព្រាហ្មណ’’ន្តិ.

តស្សត្ថោ – សាដកាភរណាទីសុ ទីឃំ វា រស្សំ វា មណិមុត្តាទីសុ អណុំ វា ថូលំ វា មហគ្ឃអប្បគ្ឃវសេន សុភំ វា អសុភំ វា យោ បុគ្គលោ ឥមស្មិំ លោកេ បរបរិគ្គហិតំ នាទិយតិ, តមហំ ព្រាហ្មណំ វទាមីតិ អត្ថោ.

ទេសនាវសានេ ពហូ សោតាបត្តិផលាទីនិ បាបុណិំសូតិ.

អញ្ញតរត្ថេរវត្ថុ ឆព្ពីសតិមំ.