២២. អញ្ញតរភិក្ខុវត្ថុ

និធាយ ទណ្ឌន្តិ ឥមំ ធម្មទេសនំ សត្ថា ជេតវនេ វិហរន្តោ អញ្ញតរំ ភិក្ខុំ អារព្ភ កថេសិ.

សោ កិរ សត្ថុ សន្តិកេ កម្មដ្ឋានំ គហេត្វា អរញ្ញេ វាយមន្តោ អរហត្តំ បត្វា ‘‘បដិលទ្ធគុណំ សត្ថុ អារោចេស្សាមី’’តិ តតោ និក្ខមិ. អថ នំ ឯកស្មិំ គាមេ ឯកា ឥត្ថី សាមិកេន សទ្ធិំ កលហំ កត្វា តស្មិំ ពហិ និក្ខន្តេ ‘‘កុលឃរំ គមិស្សាមី’’តិ មគ្គំ បដិបន្នា អន្តរាមគ្គេ ទិស្វា ‘‘ឥមំ ថេរំ និស្សាយ គមិស្សាមី’’តិ បិដ្ឋិតោ បិដ្ឋិតោ អនុពន្ធិ. ថេរោ បន តំ ន បស្សតិ. អថស្សា សាមិកោ គេហំ អាគតោ តំ អទិស្វា ‘‘កុលគាមំ គតា ភវិស្សតី’’តិ អនុពន្ធន្តោ តំ ទិស្វា ‘‘ន សក្កា ឥមាយ ឯកិកាយ ឥមំ អដវិំ បដិបជ្ជិតុំ, កំ នុ ខោ និស្សាយ គច្ឆតី’’តិ ឱលោកេន្តោ ថេរំ ទិស្វា ‘‘អយំ ឥមំ គណ្ហិត្វា និក្ខន្តោ ភវិស្សតី’’តិ ចិន្តេត្វា ថេរំ សន្តជ្ជេសិ. អថ នំ សា ឥត្ថី ‘‘នេវ មំ ឯស ភទន្តោ បស្សតិ, ន អាលបតិ, មា នំ កិញ្ចិ អវចា’’តិ អាហ. សោ ‘‘កិំ បន ត្វំ អត្តានំ គហេត្វា គច្ឆន្តំ មម អាចិក្ខិស្សសិ, តុយ្ហមេវ អនុច្ឆវិកំ ឥមស្ស ករិស្សាមី’’តិ ឧប្បន្នកោធោ ឥត្ថិយា អាឃាតេន ថេរំ បោថេត្វា តំ អាទាយ និវត្តិ. ថេរស្ស សកលសរីរំ សញ្ជាតគណ្ឌំ អហោសិ. អថស្ស វិហារំ គតកាលេ ភិក្ខូ សរីរំ សម្ពាហន្តា គណ្ឌេ ទិស្វា ‘‘កិំ ឥទ’’ន្តិ បុច្ឆិំសុ. សោ តេសំ តមត្ថំ អារោចេសិ. អថ នំ ភិក្ខូ, ‘‘អាវុសោ, តស្មិំ បុរិសេ ឯវំ បហរន្តេ ត្វំ កិំ អវច, កិំ វា តេ កោធោ ឧប្បន្នោ’’តិ. ‘‘ន មេ, អាវុសោ, កោធោ ឧប្បជ្ជី’’តិ វុត្តេ សត្ថុ សន្តិកំ គន្ត្វា តមត្ថំ អារោចេត្វា, ‘‘ភន្តេ, ឯស ភិក្ខុ ‘កោធោ តេ ឧប្បជ្ជតី’តិ វុច្ចមានោ ‘ន មេ, អាវុសោ, កោធោ ឧប្បជ្ជតី’តិ អភូតំ វត្វា អញ្ញំ ព្យាករោតី’’តិ អារោចេសុំ. សត្ថា តេសំ កថំ សុត្វា, ‘‘ភិក្ខវេ, ខីណាសវា នាម និហិតទណ្ឌា, តេ បហរន្តេសុបិ កោធំ ន ករោន្តិយេវា’’តិ វត្វា ឥមំ គាថមាហ –

៤០៥. ‘‘និធាយ ទណ្ឌំ ភូតេសុ, តសេសុ ថាវរេសុ ច;

យោ ន ហន្តិ ន ឃាតេតិ, តមហំ ព្រូមិ ព្រាហ្មណ’’ន្តិ.

តត្ថ និធាយាតិ និក្ខិបិត្វា ឱរោបេត្វា. តសេសុ ថាវរេសុ ចាតិ តណ្ហាតាសេន តសេសុ, តណ្ហាអភាវេន ថិរតាយ ថាវរេសុ ច. យោ ន ហន្តីតិ យោ ឯវំ សព្ពសត្តេសុ វិគតបដិឃតាយ និក្ខិត្តទណ្ឌោ នេវ កញ្ចិ សយំ ហនតិ, ន អញ្ញេ ឃាតេតិ, តមហំ ព្រាហ្មណំ វទាមីតិ អត្ថោ.

ទេសនាវសានេ ពហូ សោតាបត្តិផលាទីនិ បាបុណិំសូតិ.

អញ្ញតរភិក្ខុវត្ថុ ពាវីសតិមំ.