៩. សន្តកាយត្ថេរវត្ថុ

សន្តកាយោតិ ឥមំ ធម្មទេសនំ សត្ថា ជេតវនេ វិហរន្តោ សន្តកាយត្ថេរំ នាម អារព្ភ កថេសិ.

តស្ស កិរ ហត្ថបាទកុក្កុច្ចំ នាម នាហោសិ, កាយវិជម្ភនរហិតោ សន្តអត្តភាវោវ អហោសិ. សោ កិរ សីហយោនិតោ អាគតោ ថេរោ. សីហា កិរ ឯកទិវសំ គោចរំ គហេត្វា រជតសុវណ្ណមណិបវាឡគុហានំ អញ្ញតរំ បវិសិត្វា មនោសិលាតលេ ហរិតាលចុណ្ណេសុ សត្តាហំ និបជ្ជិត្វា សត្តមេ ទិវសេ ឧដ្ឋាយ និបន្នដ្ឋានំ ឱលោកេត្វា សចេ នង្គុដ្ឋស្ស វា កណ្ណានំ វា ហត្ថបាទានំ វា ចលិតត្តា មនោសិលាហរិតាលចុណ្ណានំ វិប្បកិណ្ណតំ បស្សន្តិ, ‘‘ន តេ ឥទំ ជាតិយា វា គោត្តស្ស វា បតិរូប’’ន្តិ បុន សត្តាហំ និរាហារា និបជ្ជន្តិ, ចុណ្ណានំ បន វិប្បកិណ្ណភាវេ អសតិ ‘‘ឥទំ តេ ជាតិគោត្តានំ អនុច្ឆវិក’’ន្តិ អាសយា និក្ខមិត្វា វិជម្ភិត្វា ទិសា អនុវិលោកេត្វា តិក្ខត្តុំ សីហនាទំ នទិត្វា គោចរាយ បក្កមន្តិ. ឯវរូបាយ សីហយោនិយា អាគតោ អយំ ភិក្ខុ. តស្ស កាយសមាចារំ ទិស្វា ភិក្ខូ សត្ថុ អារោចេសុំ – ‘‘ន នោ, ភន្តេ, សន្តកាយត្ថេរសទិសោ ភិក្ខុ ទិដ្ឋបុព្ពោ. ឥមស្ស ហិ និសិន្នដ្ឋានេ ហត្ថចលនំ វា បាទចលនំ វា កាយវិជម្ភិតា វា នត្ថី’’តិ. តំ សុត្វា សត្ថា, ‘‘ភិក្ខវេ, ភិក្ខុនា នាម សន្តកាយត្ថេរេន វិយ កាយាទីហិ ឧបសន្តេនេវ ភវិតព្ព’’ន្តិ វត្វា ឥមំ គាថមាហ –

៣៧៨. ‘‘សន្តកាយោ សន្តវាចោ, សន្តវា សុសមាហិតោ;

វន្តលោកាមិសោ ភិក្ខុ, ឧបសន្តោតិ វុច្ចតី’’តិ.

តត្ថ សន្តកាយោតិ បាណាតិបាតាទីនំ អភាវេន សន្តកាយោ, មុសាវាទាទីនំ អភាវេន សន្តវាចោ, អភិជ្ឈាទីនំ អភាវេន សន្តវា, កាយាទីនំ តិណ្ណម្បិ សុដ្ឋុ សមាហិតត្តា សុសមាហិតោ, ចតូហិ មគ្គេហិ លោកាមិសស្ស វន្តតាយ វន្តលោកាមិសោ ភិក្ខុ អព្ភន្តរេ រាគាទីនំ ឧបសន្តតាយ ឧបសន្តោតិ វុច្ចតីតិ អត្ថោ.

ទេសនាវសានេ សោ ថេរោ អរហត្តេ បតិដ្ឋហិ, សម្បត្តានម្បិ សាត្ថិកា ធម្មទេសនា អហោសីតិ.

សន្តកាយត្ថេរវត្ថុ នវមំ.