៤. អនត្តលក្ខណវត្ថុ

តតិយគាថាយបិ ឯសេវ នយោ. កេវលញ្ហិ ឯត្ថ ភគវា តេសំ ភិក្ខូនំ បុព្ពេ អនត្តលក្ខណេ អនុយុត្តភាវំ ញត្វា, ‘‘ភិក្ខវេ, សព្ពេបិ ខន្ធា អវសវត្តនដ្ឋេន អនត្តា ឯវា’’តិ វត្វា ឥមំ គាថមាហ –

២៧៩. ‘‘សព្ពេ ធម្មា អនត្តាតិ, យទា បញ្ញាយ បស្សតិ;

អថ និព្ពិន្ទតិ ទុក្ខេ, ឯស មគ្គោ វិសុទ្ធិយា’’តិ.

តត្ថ សព្ពេ ធម្មាតិ បញ្ចក្ខន្ធា ឯវ អធិប្បេតា. អនត្តាតិ ‘‘មា ជីយន្តុ មា មីយន្តូ’’តិ វសេ វត្តេតុំ ន សក្កាតិ អវសវត្តនដ្ឋេន អនត្តា អត្តសុញ្ញា អស្សាមិកា អនិស្សរាតិ អត្ថោ. សេសំ បុរិមសទិសមេវាតិ.

អនត្តលក្ខណវត្ថុ ចតុត្ថំ.