៧. បញ្ចឧបាសកវត្ថុ

យោ បាណន្តិ ឥមំ ធម្មទេសនំ សត្ថា ជេតវនេ វិហរន្តោ បញ្ច ឧបាសកេ អារព្ភ កថេសិ.

តេសុ ហិ ឯកោ បាណាតិបាតាវេរមណិសិក្ខាបទមេវ រក្ខតិ, ឥតរេ ឥតរានិ. តេ ឯកទិវសំ ‘‘អហំ ទុក្ករំ ករោមិ, ទុក្ករំ រក្ខាមី’’តិ វិវាទាបន្នា សត្ថុ សន្តិកំ គន្ត្វា វន្ទិត្វា តមត្ថំ អារោចេសុំ. សត្ថា តេសំ កថំ សុត្វា ឯកសីលម្បិ កនិដ្ឋកំ អកត្វា ‘‘សព្ពានេវ ទុរក្ខានី’’តិ វត្វា ឥមា គាថា អភាសិ –

២៤៦. ‘‘យោ បាណមតិបាតេតិ, មុសាវាទញ្ច ភាសតិ;

លោកេ អទិន្នមាទិយតិ, បរទារញ្ច គច្ឆតិ.

២៤៧. ‘‘សុរាមេរយបានញ្ច, យោ នរោ អនុយុញ្ជតិ;

ឥធេវ មេសោ លោកស្មិំ, មូលំ ខណតិ អត្តនោ.

២៤៨. ‘‘ឯវំ ភោ បុរិស ជានាហិ, បាបធម្មា អសញ្ញតា;

មា តំ លោភោ អធម្មោ ច, ចិរំ ទុក្ខាយ រន្ធយុ’’ន្តិ.

តត្ថ យោ បាណមតិបាតេតីតិ យោ សាហត្ថិកាទីសុ ឆសុ បយោគេសុ ឯកបយោគេនាបិ បរស្ស ជីវិតិន្ទ្រិយំ ឧបច្ឆិន្ទតិ. មុសាវាទន្តិ បរេសំ អត្ថភញ្ជនកំ មុសាវាទញ្ច ភាសតិ. លោកេ អទិន្នមាទិយតីតិ ឥមស្មិំ សត្តលោកេ ថេយ្យាវហារាទីសុ ឯកេនបិ អវហារេន បរបរិគ្គហិតំ អាទិយតិ. បរទារញ្ច គច្ឆតីតិ បរស្ស រក្ខិតគោបិតេសុ ភណ្ឌេសុ អបរជ្ឈន្តោ ឧប្បថចារំ ចរតិ. សុរាមេរយបានន្តិ យស្ស កស្សចិ សុរាយ ចេវ មេរយស្ស ច បានំ. អនុយុញ្ជតីតិ សេវតិ ពហុលីករោតិ. មូលំ ខណតីតិ តិដ្ឋតុ បរលោកោ, សោ បន បុគ្គលោ ឥធ លោកស្មិំយេវ យេន ខេត្តវត្ថុអាទិនា មូលេន បតិដ្ឋបេយ្យ, តម្បិ អដ្ឋបេត្វា វា វិស្សជ្ជេត្វា វា សុរំ បិវន្តោ អត្តនោ មូលំ ខណតិ, អនាថោ កបណោ ហុត្វា វិចរតិ. ឯវំ, ភោតិ បញ្ចទុស្សីល្យកម្មការកំ បុគ្គលំ អាលបតិ. បាបធម្មាតិ លាមកធម្មា. អសញ្ញតាតិ កាយសញ្ញតាទិរហិតា. អចេតសាតិបិ បាឋោ, អចិត្តកាតិ អត្ថោ. លោភោ អធម្មោ ចាតិ លោភោ ចេវ ទោសោ ច. ឧភយម្បិ ហេតំ អកុសលមេវ. ចិរំ ទុក្ខាយ រន្ធយុន្តិ ចិរកាលំ និរយទុក្ខាទីនំ អត្ថាយ តំ ឯតេ ធម្មា មា រន្ធេន្តុ មា មត្ថេន្តូតិ អត្ថោ.

ទេសនាវសានេ តេ បញ្ច ឧបាសកា សោតាបត្តិផលេ បតិដ្ឋហិំសុ, សម្បត្តានម្បិ សាត្ថិកា ធម្មទេសនា អហោសីតិ.

បញ្ចឧបាសកវត្ថុ សត្តមំ.