៧. តិស្សត្ថេរវត្ថុ

បវិវេករសន្តិ ឥមំ ធម្មទេសនំ សត្ថា វេសាលិយំ វិហរន្តោ អញ្ញតរំ ភិក្ខុំ អារព្ភ កថេសិ.

សត្ថារា ហិ, ‘‘ភិក្ខវេ, អហំ ឥតោ ចតូហិ មាសេហិ បរិនិព្ពាយិស្សាមី’’តិ វុត្តេ សត្ថុ សន្តិកេ សត្ត ភិក្ខុសតានិ សន្តាសំ អាបជ្ជិំសុ, ខីណាសវានំ ធម្មសំវេគោ ឧប្បជ្ជិ, បុថុជ្ជនា អស្សូនិ សន្ធារេតុំ នាសក្ខិំសុ. ភិក្ខូ វគ្គា វគ្គា ហុត្វា ‘‘កិំ នុ ខោ ករិស្សាមា’’តិ មន្តេន្តា វិចរន្តិ. អថេកោ តិស្សត្ថេរោ នាម ភិក្ខូ ‘‘សត្ថា កិរ ចតុមាសច្ចយេន បរិនិព្ពាយិស្សតិ, អហញ្ចម្ហិ អវីតរាគោ, សត្ថរិ ធរមានេយេវ មយា អរហត្តំ គណ្ហិតុំ វដ្ដតី’’តិ ចតូសុ ឥរិយាបថេសុ ឯកកោវ វិហាសិ. ភិក្ខូនំ សន្តិកេ គមនំ វា កេនចិ សទ្ធិំ កថាសល្លាបោ វា នត្ថិ. អថ នំ ភិក្ខូ អាហំសុ – ‘‘អាវុសោ, តិស្ស តស្មា ឯវំ ករោសី’’តិ. សោ តេសំ កថំ ន សុណាតិ. តេ តស្ស បវត្តិំ សត្ថុ អារោចេត្វា, ‘‘ភន្តេ, តុម្ហេសុ តិស្សត្ថេរស្ស សិនេហោ នត្ថី’’តិ អាហំសុ. សត្ថា តំ បក្កោសាបេត្វា ‘‘កស្មា តិស្ស ឯវំ អកាសី’’តិ បុច្ឆិត្វា តេន អត្តនោ អធិប្បាយេ អារោចិតេ ‘‘សាធុ, តិស្សា’’តិ សាធុការំ ទត្វា, ‘‘ភិក្ខវេ, មយិ សិនេហោ តិស្សសទិសោវ ហោតុ. គន្ធមាលាទីហិ បូជំ ករោន្តាបិ នេវ មំ បូជេន្តិ, ធម្មានុធម្មំ បដិបជ្ជមានាយេវ បន មំ បូជេន្តី’’តិ វត្វា ឥមំ គាថមាហ –

២០៥. ‘‘បវិវេករសំ បិត្វា, រសំ ឧបសមស្ស ច;

និទ្ទរោ ហោតិ និប្បាបោ, ធម្មបីតិរសំ បិវ’’ន្តិ.

តត្ថ បវិវេករសន្តិ បវិវេកតោ ឧប្បន្នំ រសំ, ឯកីភាវសុខន្តិ អត្ថោ. បិត្វាតិ ទុក្ខបរិញ្ញាទីនិ ករោន្តោ អារម្មណតោ សច្ឆិកិរិយាវសេន បិវិត្វា. ឧបសមស្ស ចាតិ កិលេសូបសមនិព្ពានស្ស ច រសំ បិត្វា. និទ្ទរោ ហោតីតិ តេន ឧភយរសបានេន ខីណាសវោ ភិក្ខុ អព្ភន្តរេ រាគទរថាទីនំ អភាវេន និទ្ទរោ ចេវ និប្បាបោ ច ហោតិ. រសំ បិវន្តិ នវវិធលោកុត្តរធម្មវសេន ឧប្បន្នំ បីតិរសំ បិវន្តោបិ និទ្ទរោ និប្បាបោ ច ហោតិ.

ទេសនាវសានេ តិស្សត្ថេរោ អរហត្តំ បាបុណិ, មហាជនស្សាបិ សាត្ថិកា ធម្មទេសនា អហោសីតិ.

តិស្សត្ថេរវត្ថុ សត្តមំ.