៥. ឧបោសថិកឥត្ថីនំ វត្ថុ

យថា ទណ្ឌេនាតិ ឥមំ ធម្មទេសនំ សត្ថា បុព្ពារាមេ វិហរន្តោ វិសាខាទីនំ ឧបាសិកានំ ឧបោសថកម្មំ អារព្ភ កថេសិ.

សាវត្ថិយំ កិរ ឯកស្មិំ មហាឧបោសថទិវសេ បញ្ចសតមត្តា ឥត្ថិយោ ឧបោសថិកា ហុត្វា វិហារំ អគមិំសុ. វិសាខា តាសុ មហល្លកិត្ថិយោ ឧបសង្កមិត្វា បុច្ឆិ, ‘‘អម្មា, កិមត្ថំ ឧបោសថិកា ជាតត្ថា’’តិ. តាហិ ‘‘ទិព្ពសម្បត្តិំ បត្ថេត្វា’’តិ វុត្តេ មជ្ឈិមិត្ថិយោ បុច្ឆិ, តាហិ ‘‘សបត្តិវាសា មុច្ចនត្ថាយា’’តិ វុត្តេ តរុណិត្ថិយោ បុច្ឆិ, តាហិ ‘‘បឋមគព្ភេ បុត្តបដិលាភត្ថាយា’’តិ វុត្តេ កុមារិកាយោ បុច្ឆិ, តាហិ ‘‘តរុណភាវេយេវ បតិកុលគមនត្ថាយា’’តិ វុត្តេ តំ សព្ពម្បិ តាសំ កថំ សុត្វា តា អាទាយ សត្ថុ សន្តិកំ គន្ត្វា បដិបាដិយា អារោចេសិ. តំ សុត្វា សត្ថា ‘‘វិសាខេ ឥមេសំ សត្តានំ ជាតិអាទយោ នាម ទណ្ឌហត្ថកគោបាលកសទិសា, ជាតិ ជរាយ សន្តិកំ, ជរា ព្យាធិនោ សន្តិកំ, ព្យាធិ មរណស្ស សន្តិកំ បេសេត្វា មរណំ កុឋារិយា ឆិន្ទន្តា វិយ ជីវិតំ ឆិន្ទតិ, ឯវំ សន្តេបិ វិវដ្ដំ បត្ថេន្តា នាម នត្ថិ, វដ្ដមេវ បន បត្ថេន្តី’’តិ វត្វា អនុសន្ធិំ ឃដេត្វា ធម្មំ ទេសេន្តោ ឥមំ គាថមាហ –

១៣៥. ‘‘យថា ទណ្ឌេន គោបាលោ, គាវោ បាជេតិ គោចរំ;

ឯវំ ជរា ច មច្ចុ ច, អាយុំ បាជេន្តិ បាណិន’’ន្តិ.

តត្ថ បាជេតីតិ ឆេកោ គោបាលោ កេទារន្តរំ បវិសន្តិយោ គាវោ ទណ្ឌេន និវារេត្វា តេនេវ បោថេន្តោ សុលភតិណោទកំ គោចរំ នេតិ. អាយុំ បាជេន្តីតិ ជីវិតិន្ទ្រិយំ ឆិន្ទន្តិ ខេបេន្តិ. គោបាលកោ វិយ ហិ ជរា ច មច្ចុ ច, គោគណោ វិយ ជីវិតិន្ទ្រិយំ, គោចរភូមិ វិយ មរណំ. តត្ថ ជាតិ តាវ សត្តានំ ជីវិតិន្ទ្រិយំ ជរាយ សន្តិកំ បេសេសិ, ជរា ព្យាធិនោ សន្តិកំ, ព្យាធិ មរណស្ស សន្តិកំ. តមេវ មរណំ កុឋារិយា ឆេទំ វិយ ឆិន្ទិត្វា គច្ឆតីតិ ឥទមេត្ថ ឱបម្មសម្បដិបាទនំ.

ទេសនាវសានេ ពហូ សោតាបត្តិផលាទីនិ បាបុណិំសូតិ.

ឧបោសថិកឥត្ថីនំ វត្ថុ បញ្ចមំ.