៧. សារិបុត្តត្ថេរស្ស សហាយកព្រាហ្មណវត្ថុ

យំ កិញ្ចិ យិដ្ឋំ វាតិ ឥមំ ធម្មទេសនំ សត្ថា វេឡុវនេ វិហរន្តោ សារិបុត្តត្ថេរស្ស សហាយកព្រាហ្មណំ អារព្ភ កថេសិ.

តម្បិ ហិ ថេរោ ឧបសង្កមិត្វា ‘‘កិំ, ព្រាហ្មណ, កិញ្ចិ កុសលំ ករោសី’’តិ បុច្ឆិ. ‘‘អាម, ភន្តេ’’តិ. ‘‘កិំ ករោសី’’តិ? ‘‘យិដ្ឋយាគំ យជាមី’’តិ. ‘‘តទា កិរ តំ យាគំ មហាបរិច្ចាគេន យជ’’ន្តិ. ឥតោ បរំ ថេរោ បុរិមនយេនេវ បុច្ឆិត្វា តំ សត្ថុ សន្តិកំ នេត្វា តំ បវត្តិំ អារោចេត្វា ‘‘ឥមស្ស, ភន្តេ, ព្រហ្មលោកស្ស មគ្គំ កថេថា’’តិ អាហ. សត្ថា, ‘‘ព្រាហ្មណ, ឯវំ កិរា’’តិ បុច្ឆិត្វា ‘‘ឯវំ, ភោ គោតមា’’តិ វុត្តេ, ‘‘ព្រាហ្មណ, តយា សំវច្ឆរំ យិដ្ឋយាគំ យជន្តេន លោកិយមហាជនស្ស ទិន្នទានំ បសន្នចិត្តេន មម សាវកានំ វន្ទន្តានំ ឧប្បន្នកុសលចេតនាយ ចតុភាគមត្តម្បិ ន អគ្ឃតី’’តិ វត្វា អនុសន្ធិំ ឃដេត្វា ធម្មំ ទេសេន្តោ ឥមំ គាថមាហ –

១០៨. ‘‘យំ កិញ្ចិ យិដ្ឋំ វ ហុតំ វ លោកេ,

សំវច្ឆរំ យជេថ បុញ្ញបេក្ខោ;

សព្ពម្បិ តំ ន ចតុភាគមេតិ,

អភិវាទនា ឧជ្ជុគតេសុ សេយ្យោ’’តិ.

តត្ថ យំ កិញ្ចីតិ អនវសេសបរិយាទានវចនមេតំ. យិដ្ឋន្តិ យេភុយ្យេន មង្គលកិរិយាទិវសេសុ ទិន្នទានំ. ហុតន្តិ អភិសង្ខរិត្វា កតំ បាហុនទានញ្ចេវ, កម្មញ្ច ផលញ្ច សទ្ទហិត្វា កតទានញ្ច. សំវច្ឆរំ យជេថាតិ ឯកសំវច្ឆរំ និរន្តរមេវ វុត្តប្បការំ ទានំ សកលចក្កវាឡេបិ លោកិយមហាជនស្ស ទទេយ្យ. បុញ្ញបេក្ខោតិ បុញ្ញំ ឥច្ឆន្តោ. ឧជ្ជុគតេសូតិ ហេដ្ឋិមកោដិយា សោតាបន្នេសុ ឧបរិមកោដិយា ខីណាសវេសុ. ឥទំ វុត្តំ ហោតិ – ‘‘ឯវរូបេសុ បសន្នចិត្តេន សរីរំ ឱនមិត្វា វន្ទន្តស្ស កុសលចេតនាយ យំ ផលំ, តតោ ចតុភាគម្បិ សព្ពំ តំ ទានំ ន អគ្ឃតិ, តស្មា ឧជុគតេសុ អភិវាទនមេវ សេយ្យោ’’តិ.

ទេសនាវសានេ សោ ព្រាហ្មណោ សោតាបត្តិផលំ បត្តោ, អញ្ញេបិ ពហូ សោតាបត្តិផលាទីនិ បាបុណិំសូតិ.

សារិបុត្តត្ថេរស្ស សហាយកព្រាហ្មណវត្ថុ សត្តមំ.