បញ្ហសមោធានវណ្ណនា

៣៤៩. ឥធ បន ឋត្វា បញ្ហា សមោធានេតព្ពា. ឥមស្មិញ្ហិ សុត្តេ ឯកកវសេន ទ្វេ បញ្ហា កថិតា. ទុកវសេន សត្តតិ. តិកវសេន អសីតិសតំ. ចតុក្កវសេន ទ្វេសតានិ. បញ្ចកវសេន តិំសសតំ. ឆក្កវសេន ពាត្តិំសសតំ. សត្តកវសេន អដ្ឋនវុតិ. អដ្ឋកវសេន អដ្ឋាសីតិ. នវកវសេន ចតុបណ្ណាស. ទសកវសេន សមសដ្ឋីតិ ឯវំ សហស្សំ ចុទ្ទស បញ្ហា កថិតា.

ឥមញ្ហិ សុត្តន្តំ ឋបេត្វា តេបិដកេ ពុទ្ធវចនេ អញ្ញោ សុត្តន្តោ ឯវំ ពហុបញ្ហបដិមណ្ឌិតោ នត្ថិ. ភគវា ឥមំ សុត្តន្តំ អាទិតោ បដ្ឋាយ សកលំ សុត្វា ចិន្តេសិ – ‘‘ធម្មសេនាបតិ សារិបុត្តោ ពុទ្ធពលំ ទីបេត្វា អប្បដិវត្តិយំ សីហនាទំ នទតិ. សាវកភាសិតោតិ វុត្តេ ឱកប្បនា ន ហោតិ, ជិនភាសិតោតិ វុត្តេ ហោតិ, តស្មា ជិនភាសិតំ កត្វា ទេវមនុស្សានំ ឱកប្បនំ ឥមស្មិំ សុត្តន្តេ ឧប្បាទេស្សាមី’’តិ. តតោ វុដ្ឋាយ សាធុការំ អទាសិ. តេន វុត្តំ ‘‘អថ ខោ ភគវា វុដ្ឋហិត្វា អាយស្មន្តំ សារិបុត្តំ អាមន្តេសិ, សាធុ, សាធុ, សារិបុត្ត, សាធុ ខោ ត្វំ សារិបុត្ត, ភិក្ខូនំ សង្គីតិបរិយាយំ អភាសី’’តិ.

តត្ថ សង្គីតិបរិយាយន្តិ សាមគ្គិយា ការណំ. ឥទំ វុត្តំ ហោតិ – ‘‘សាធុ, ខោ ត្វំ, សារិបុត្ត, មម សព្ពញ្ញុតញ្ញាណេន សំសន្ទិត្វា ភិក្ខូនំ សាមគ្គិរសំ អភាសី’’តិ. សមនុញ្ញោ សត្ថា អហោសីតិ អនុមោទនេន សមនុញ្ញោ អហោសិ. ឯត្តកេន អយំ សុត្តន្តោ ជិនភាសិតោ នាម ជាតោ. ទេសនាបរិយោសានេ ឥមំ សុត្តន្តំ មនសិករោន្តា តេ ភិក្ខូ អរហត្តំ បាបុណិំសូតិ.

សុមង្គលវិលាសិនិយា ទីឃនិកាយដ្ឋកថាយ

សង្គីតិសុត្តវណ្ណនា និដ្ឋិតា.