នវកវណ្ណនា

៣៤០. ឥតិ អដ្ឋកវសេន សាមគ្គិរសំ ទស្សេត្វា ឥទានិ នវកវសេន ទស្សេតុំ បុន ទេសនំ អារភិ. តត្ថ អាឃាតវត្ថូនីតិ អាឃាតការណានិ. អាឃាតំ ពន្ធតីតិ កោបំ ពន្ធតិ ករោតិ ឧប្បាទេតិ.

តំ កុតេត្ថ លព្ភាតិ តំ អនត្ថចរណំ មា អហោសីតិ ឯតស្មិំ បុគ្គលេ កុតោ លព្ភា, កេន ការណេន សក្កា លទ្ធុំ? បរោ នាម បរស្ស អត្តនោ ចិត្តរុចិយា អនត្ថំ ករោតីតិ ឯវំ ចិន្តេត្វា អាឃាតំ បដិវិនោទេតិ. អថ វា សចាហំ បដិកោបំ ករេយ្យំ, តំ កោបករណំ ឯត្ថ បុគ្គលេ កុតោ លព្ភា, កេន ការណេន លទ្ធព្ពន្តិ អត្ថោ. កុតោ លាភាតិបិ បាឋោ, សចាហំ ឯត្ថ កោបំ ករេយ្យំ, តស្មិំ មេ កោបករណេ កុតោ លាភា, លាភា នាម កេ សិយុន្តិ អត្ថោ. ឥមស្មិញ្ច អត្ថេ តន្តិ និបាតមត្តមេវ ហោតិ.

៣៤១. សត្តាវាសាតិ សត្តានំ អាវាសា, វសនដ្ឋានានីតិ អត្ថោ. តត្ថ សុទ្ធាវាសាបិ សត្តាវាសោវ, អសព្ពកាលិកត្តា បន ន គហិតា. សុទ្ធាវាសា ហិ ពុទ្ធានំ ខន្ធាវារសទិសា. អសង្ខ្យេយ្យកប្បេ ពុទ្ធេសុ អនិព្ពត្តន្តេសុ តំ ឋានំ សុញ្ញំ ហោតីតិ អសព្ពកាលិកត្តា ន គហិតា. សេសមេត្ថ យំ វត្តព្ពំ, តំ ហេដ្ឋា វុត្តមេវ.

៣៤២. អក្ខណេសុ ធម្មោ ច ទេសិយតីតិ ចតុសច្ចធម្មោ ទេសិយតិ. ឱបសមិកោតិ កិលេសូបសមករោ. បរិនិព្ពានិកោតិ កិលេសបរិនិព្ពានេន បរិនិព្ពានាវហោ. សម្ពោធគាមីតិ ចតុមគ្គញាណបដិវេធគាមី. អញ្ញតរន្តិ អសញ្ញភវំ វា អរូបភវំ វា.

៣៤៣. អនុបុព្ពវិហារាតិ អនុបដិបាដិយា សមាបជ្ជិតព្ពវិហារា.

៣៤៤. អនុបុព្ពនិរោធាតិ អនុបដិបាដិយា និរោធា.

‘‘ឥមេ, ខោ អាវុសោ’’តិអាទិ វុត្តនយេនេវ យោជេតព្ពំ. ឥតិ ឆន្នំ នវកានំ វសេន ចតុបណ្ណាស បញ្ហេ កថេន្តោ ថេរោ សាមគ្គិរសំ ទស្សេសីតិ.

នវកវណ្ណនា និដ្ឋិតា.