សត្តកវណ្ណនា

៣៣០. ឥតិ ឆក្កវសេន សាមគ្គិរសំ ទស្សេត្វា ឥទានិ សត្តកវសេន ទស្សេតុំ បុន ទេសនំ អារភិ.

តត្ថ សម្បត្តិបដិលាភដ្ឋេន សទ្ធាវ ធនំ សទ្ធាធនំ. ឯស នយោ សព្ពត្ថ. បញ្ញាធនំ បនេត្ថ សព្ពសេដ្ឋំ. បញ្ញាយ ហិ ឋត្វា តីណិ សុចរិតានិ បញ្ចសីលានិ ទសសីលានិ បូរេត្វា សគ្គូបគា ហោន្តិ, សាវកបារមីញាណំ, បច្ចេកពោធិញាណំ, សព្ពញ្ញុតញ្ញាណញ្ច បដិវិជ្ឈន្តិ. ឥមាសំ សម្បត្តីនំ បដិលាភការណតោ បញ្ញា ‘‘ធន’’ន្តិ វុត្តា. សត្តបិ ចេតានិ លោកិយលោកុត្តរមិស្សកានេវ កថិតានិ. ពោជ្ឈង្គកថា កថិតាវ.

សមាធិបរិក្ខារាតិ សមាធិបរិវារា. សម្មាទិដ្ឋាទីនិ វុត្តត្ថានេវ. ឥមេបិ សត្ត បរិក្ខារា លោកិយលោកុត្តរាវ កថិតា.

អសតំ ធម្មា អសន្តា វា ធម្មា លាមកា ធម្មាតិ អសទ្ធម្មា. វិបរិយាយេន សទ្ធម្មា វេទិតព្ពា. សេសមេត្ថ ឧត្តានត្ថមេវ. សទ្ធម្មេសុ បន សទ្ធាទយោ សព្ពេបិ វិបស្សកស្សេវ កថិតា. តេសុបិ បញ្ញា លោកិយលោកុត្តរា. អយំ វិសេសោ.

សប្បុរិសានំ ធម្មាតិ សប្បុរិសធម្មា. តត្ថ សុត្តគេយ្យាទិកំ ធម្មំ ជានាតីតិ ធម្មញ្ញូ. តស្ស តស្សេវ ភាសិតស្ស អត្ថំ ជានាតីតិ អត្ថញ្ញូ. ‘‘ឯត្តកោម្ហិ សីលេន សមាធិនា បញ្ញាយា’’តិ ឯវំ អត្តានំ ជានាតីតិ អត្តញ្ញូ. បដិគ្គហណបរិភោគេសុ មត្តំ ជានាតីតិ មត្តញ្ញូ. អយំ កាលោ ឧទ្ទេសស្ស, អយំ កាលោ បរិបុច្ឆាយ, អយំ កាលោ យោគស្ស អធិគមាយាតិ ឯវំ កាលំ ជានាតីតិ កាលញ្ញូ. ឯត្ថ ច បញ្ច វស្សានិ ឧទ្ទេសស្ស កាលោ. ទស បរិបុច្ឆាយ. ឥទំ អតិសម្ពាធំ. ទស វស្សានិ បន ឧទ្ទេសស្ស កាលោ. វីសតិ បរិបុច្ឆាយ. តតោ បរំ យោគេ កម្មំ កាតព្ពំ. អដ្ឋវិធំ បរិសំ ជានាតីតិ បរិសញ្ញូ. សេវិតព្ពាសេវិតព្ពំ បុគ្គលំ ជានាតីតិ បុគ្គលញ្ញូ.

៣៣១. និទ្ទសវត្ថូនីតិ និទ្ទសាទិវត្ថូនិ. និទ្ទសោ ភិក្ខុ, និព្ពីសោ, និត្តិំសោ, និច្ចត្តាលីសោ, និប្បញ្ញាសោ ភិក្ខូតិ ឯវំ វចនការណានិ. អយំ កិរ បញ្ហោ តិត្ថិយសមយេ ឧប្បន្នោ. តិត្ថិយា ហិ ទសវស្សកាលេ មតំ និគណ្ឋំ និទ្ទសោតិ វទន្តិ. សោ កិរ បុន ទសវស្សោ ន ហោតិ. ន កេវលញ្ច ទសវស្សោវ. នវវស្សោបិ…បេ… ឯកវស្សោបិ ន ហោតិ. ឯតេនេវ នយេន វីសតិវស្សាទិកាលេបិ មតំ និព្ពីសោ, និត្តិំសោ, និច្ចត្តាលីសោ, និប្បញ្ញាសោតិ វទន្តិ. អាយស្មា អានន្ទោ គាមេ វិចរន្តោ តំ កថំ សុត្វា វិហារំ គន្ត្វា ភគវតោ អារោចេសិ. ភគវា អាហ –

‘‘ន ឥទំ, អានន្ទ, តិត្ថិយានំ អធិវចនំ មម សាសនេ ខីណាសវស្សេតំ អធិវចនំ. ខីណាសវោ ហិ ទសវស្សកាលេ បរិនិព្ពុតោ បុន ទសវស្សោ ន ហោតិ. ន កេវលញ្ច ទសវស្សោវ, នវវស្សោបិ…បេ… ឯកវស្សោបិ. ន កេវលញ្ច ឯកវស្សោវ, ទសមាសិកោបិ…បេ… ឯកមាសិកោបិ. ឯកទិវសិកោបិ. ឯកមុហុត្តោបិ ន ហោតិ ឯវ. កស្មា? បុន បដិសន្ធិយា អភាវា. និព្ពីសាទីសុបិ ឯសេវ នយោ. ឥតិ ភគវា មម សាសនេ ខីណាសវស្សេតំ អធិវចន’’ន្តិ –

វត្វា យេហិ ការណេហិ សោ និទ្ទសោ ហោតិ, តានិ ទស្សេតុំ សត្ត និទ្ទសវត្ថូនិ ទេសេតិ. ថេរោបិ តមេវ ទេសនំ ឧទ្ធរិត្វា សត្ត និទ្ទសវត្ថូនិ ឥធាវុសោ, ភិក្ខុ, សិក្ខាសមាទានេតិអាទិមាហ. តត្ថ ឥធាតិ ឥមស្មិំ សាសនេ. សិក្ខាសមាទានេ តិព្ពច្ឆន្ទោ ហោតីតិ សិក្ខត្តយបូរណេ ពហលច្ឆន្ទោ ហោតិ. អាយតិញ្ច សិក្ខាសមាទានេ អវិគតបេមោតិ អនាគតេ បុនទិវសាទីសុបិ សិក្ខាបូរណេ អវិគតបេមេន សមន្នាគតោ ហោតិ. ធម្មនិសន្តិយាតិ ធម្មនិសាមនាយ. វិបស្សនាយេតំ អធិវចនំ. ឥច្ឆាវិនយេតិ តណ្ហាវិនយនេ. បដិសល្លានេតិ ឯកីភាវេ. វីរិយារម្ភេតិ កាយិកចេតសិកស្ស វីរិយស្ស បូរណេ. សតិនេបក្កេតិ សតិយញ្ចេវ នេបក្កភាវេ ច. ទិដ្ឋិបដិវេធេតិ មគ្គទស្សនេ. សេសំ សព្ពត្ថ វុត្តនយេនេវ វេទិតព្ពំ.

សញ្ញាសុ អសុភានុបស្សនាញាណេ សញ្ញា អសុភសញ្ញា. អាទីនវានុបស្សនាញាណេ សញ្ញា អាទីនវសញ្ញា នាម. សេសា ហេដ្ឋា វុត្តា ឯវ. ពលសត្តកវិញ្ញាណដ្ឋិតិសត្តកបុគ្គលសត្តកានិ វុត្តនយានេវ. អប្បហីនដ្ឋេន អនុសយន្តីតិ អនុសយា. ថាមគតោ កាមរាគោ កាមរាគានុសយោ. ឯស នយោ សព្ពត្ថ. សំយោជនសត្តកំ ឧត្តានត្ថមេវ.