អនុត្តរិយាទិឆក្កវណ្ណនា

៣២៧. អនុត្តរិយានីតិ អនុត្តរានិ ជេដ្ឋកានិ. ទស្សនេសុ អនុត្តរិយំ ទស្សនានុត្តរិយំ. សេសបទេសុបិ ឯសេវ នយោ. តត្ថ ហត្ថិរតនាទីនំ ទស្សនំ ន ទស្សនានុត្តរិយំ, និវិដ្ឋសទ្ធស្ស បន និវិដ្ឋបេមវសេន ទសពលស្ស វា ភិក្ខុសង្ឃស្ស វា កសិណាសុភនិមិត្តាទីនំ វា អញ្ញតរស្ស ទស្សនំ ទស្សនានុត្តរិយំ នាម. ខត្តិយាទីនំ គុណកថាសវនំ ន សវនានុត្តរិយំ, និវិដ្ឋសទ្ធស្ស បន និវិដ្ឋបេមវសេន តិណ្ណំ វា រតនានំ គុណកថាសវនំ តេបិដកពុទ្ធវចនសវនំ វា សវនានុត្តរិយំ នាម. មណិរតនាទិលាភោ ន លាភានុត្តរិយំ, សត្តវិធអរិយធនលាភោ បន លាភានុត្តរិយំ នាម. ហត្ថិសិប្បាទិសិក្ខនំ ន សិក្ខានុត្តរិយំ, សិក្ខត្តយបូរណំ បន សិក្ខានុត្តរិយំ នាម. ខត្តិយាទីនំ បារិចរិយា ន បារិចរិយានុត្តរិយំ, តិណ្ណំ បន រតនានំ បារិចរិយា បារិចរិយានុត្តរិយំ នាម. ខត្តិយាទីនំ គុណានុស្សរណំ នានុស្សតានុត្តរិយំ, តិណ្ណំ បន រតនានំ គុណានុស្សរណំ អនុស្សតានុត្តរិយំ នាម.

អនុស្សតិយោវ អនុស្សតិដ្ឋានានិ នាម. ពុទ្ធានុស្សតីតិ ពុទ្ធស្ស គុណានុស្សរណំ. ឯវំ អនុស្សរតោ ហិ បីតិ ឧប្បជ្ជតិ. សោ តំ បីតិំ ខយតោ វយតោ បដ្ឋបេត្វា អរហត្តំ បាបុណាតិ. ឧបចារកម្មដ្ឋានំ នាមេតំ គិហីនម្បិ លព្ភតិ, ឯស នយោ សព្ពត្ថ. វិត្ថារកថា បនេត្ថ វិសុទ្ធិមគ្គេ វុត្តនយេនេវ វេទិតព្ពា.