សតតវិហារឆក្កវណ្ណនា

៣២៨. សតតវិហារាតិ ខីណាសវស្ស និច្ចវិហារា. ចក្ខុនា រូបំ ទិស្វាតិ ចក្ខុទ្វារារម្មណេ អាបាថគតេ តំ រូបំ ចក្ខុវិញ្ញាណេន ទិស្វា ជវនក្ខណេ ឥដ្ឋេ អរជ្ជន្តោ នេវ សុមនោ ហោតិ, អនិដ្ឋេ អទុស្សន្តោ ន ទុម្មនោ. អសមបេក្ខនេ មោហំ អនុប្បាទេន្តោ ឧបេក្ខកោ វិហរតិ មជ្ឈត្តោ, សតិយា យុត្តត្តា សតោ, សម្បជញ្ញេន យុត្តត្តា សម្បជានោ. សេសបទេសុបិ ឯសេវ នយោ. ឥតិ ឆសុបិ ទ្វារេសុ ឧបេក្ខកោ វិហរតីតិ ឥមិនា ឆឡង្គុបេក្ខា កថិតា. សម្បជានោតិ វចនតោ បន ចត្តារិ ញាណសម្បយុត្តចិត្តានិ លព្ភន្តិ. សតតវិហារាតិ វចនតោ អដ្ឋបិ មហាចិត្តានិ លព្ភន្តិ អរជ្ជន្តោ អទុស្សន្តោតិ វចនតោ ទសបិ ចិត្តានិ លព្ភន្តិ. សោមនស្សំ កថំ លព្ភតីតិ ចេ អាសេវនតោ លព្ភតិ.