និស្សរណិយឆក្កវណ្ណនា

៣២៦. និស្សរណិយា ធាតុយោតិ និស្សដធាតុយោវ. បរិយាទាយ តិដ្ឋតីតិ បរិយាទិយិត្វា ហាបេត្វា តិដ្ឋតិ. ‘មា ហេវន្តិស្ស វចនីយោ’តិ យស្មា អភូតំ ព្យាករណំ ព្យាករោតិ, តស្មា មា ឯវំ ភណីតិ វត្តព្ពោ. យទិទំ មេត្តាចេតោវិមុត្តីតិ យា អយំ មេត្តាចេតោវិមុត្តិ, ឥទំ និស្សរណំ ព្យាបាទស្ស, ព្យាបាទតោ និស្សដាតិ អត្ថោ. យោ បន មេត្តាយ តិកចតុក្កជ្ឈានតោ វុដ្ឋិតោ សង្ខារេ សម្មសិត្វា តតិយមគ្គំ បត្វា ‘‘បុន ព្យាបាទោ នត្ថី’’តិ តតិយផលេន និព្ពានំ បស្សតិ, តស្ស ចិត្តំ អច្ចន្តំ និស្សរណំ ព្យាបាទស្ស. ឯតេនុបាយេន សព្ពត្ថ អត្ថោ វេទិតព្ពោ.

អនិមិត្តា ចេតោវិមុត្តីតិ អរហត្តផលសមាបត្តិ. សា ហិ រាគនិមិត្តាទីនញ្ចេវ រូបនិមិត្តាទីនញ្ច និច្ចនិមិត្តាទីនញ្ច អភាវា ‘‘អនិមិត្តា’’តិ វុត្តា. និមិត្តានុសារីតិ វុត្តប្បភេទំ និមិត្តំ អនុសរតីតិ និមិត្តានុសារី.

អស្មីតិ អស្មិមានោ. អយមហមស្មីតិ បញ្ចសុ ខន្ធេសុ អយំ នាម អហំ អស្មីតិ ឯត្តាវតា អរហត្តំ ព្យាកតំ ហោតិ. វិចិកិច្ឆាកថំកថាសល្លន្តិ វិចិកិច្ឆាភូតំ កថំកថាសល្លំ. ‘មា ហេវន្តិស្ស វចនីយោ’តិ សចេ តេ បឋមមគ្គវជ្ឈា វិចិកិច្ឆា ឧប្បជ្ជតិ, អរហត្តព្យាករណំ មិច្ឆា ហោតិ, តស្មា មា អភូតំ ភណីតិ វារេតព្ពោ. អស្មិមានសមុគ្ឃាតោតិ អរហត្តមគ្គោ. អរហត្តមគ្គផលវសេន ហិ និព្ពានេ ទិដ្ឋេ បុន អស្មិមានោ នត្ថីតិ អរហត្តមគ្គោ អស្មិមានសមុគ្ឃាតោតិ វុត្តោ.