វិមុត្តាយតនបញ្ចកវណ្ណនា

៣២២. វិមុត្តាយតនានីតិ វិមុច្ចនការណានិ. អត្ថបដិសំវេទិនោតិ បាឡិអត្ថំ ជានន្តស្ស. ធម្មបដិសំវេទិនោតិ បាឡិំ ជានន្តស្ស. បាមោជ្ជន្តិ តរុណបីតិ. បីតីតិ តុដ្ឋាការភូតា ពលវបីតិ. កាយោតិ នាមកាយោ បដិបស្សម្ភតិ. សុខំ វេទយតីតិ សុខំ បដិលភតិ. ចិត្តំ សមាធិយតីតិ អរហត្តផលសមាធិនា សមាធិយតិ. អយញ្ហិ តំ ធម្មំ សុណន្តោ អាគតាគតដ្ឋានេ ឈានវិបស្សនាមគ្គផលានិ ជានាតិ, តស្ស ឯវំ ជានតោ បីតិ ឧប្បជ្ជតិ. សោ តស្សា បីតិយា អន្តរា ឱសក្កិតុំ ន ទេន្តោ ឧបចារកម្មដ្ឋានិកោ ហុត្វា វិបស្សនំ វឌ្ឍេត្វា អរហត្តំ បាបុណាតិ. តំ សន្ធាយ វុត្តំ – ‘‘ចិត្តំ សមាធិយតី’’តិ. សេសេសុបិ ឯសេវ នយោ. អយំ បន វិសេសោ, សមាធិនិមិត្តន្តិ អដ្ឋតិំសាយ អារម្មណេសុ អញ្ញតរោ សមាធិយេវ សមាធិនិមិត្តំ. សុគ្គហិតំ ហោតីតិអាទីសុ អាចរិយសន្តិកេ កម្មដ្ឋានំ ឧគ្គណ្ហន្តេន សុដ្ឋុ គហិតំ ហោតិ. សុដ្ឋុ មនសិកតន្តិ សុដ្ឋុ ឧបធារិតំ. សុប្បដិវិទ្ធំ បញ្ញាយាតិ បញ្ញាយ សុដ្ឋុ បច្ចក្ខំ កតំ. តស្មិំ ធម្មេតិ តស្មិំ កម្មដ្ឋានបាឡិធម្មេ.

វិមុត្តិបរិបាចនីយាតិ វិមុត្តិ វុច្ចតិ អរហត្តំ, តំ បរិបាចេន្តីតិ វិមុត្តិបរិបាចនីយា. អនិច្ចសញ្ញាតិ អនិច្ចានុបស្សនាញាណេ ឧប្បន្នសញ្ញា. អនិច្ចេ ទុក្ខសញ្ញាតិ ទុក្ខានុបស្សនាញាណេ ឧប្បន្នសញ្ញា. ទុក្ខេ អនត្តសញ្ញាតិ អនត្តានុបស្សនាញាណេ ឧប្បន្នសញ្ញា. បហានសញ្ញាតិ បហានានុបស្សនាញាណេ ឧប្បន្នសញ្ញា. វិរាគសញ្ញាតិ វិរាគានុបស្សនាញាណេ ឧប្បន្នសញ្ញា.

‘‘ឥមេ ខោ អាវុសោ’’តិអាទិ វុត្តនយេនេវ យោជេតព្ពំ. ឥតិ ឆព្ពីសតិយា បញ្ចកានំ វសេន តិំសសតបញ្ហេ កថេន្តោ ថេរោ សាមគ្គិរសំ ទស្សេសីតិ.

បញ្ចកវណ្ណនា និដ្ឋិតា.