ឆក្កវណ្ណនា

៣២៣. ឥតិ បញ្ចកវសេន សាមគ្គិរសំ ទស្សេត្វា ឥទានិ ឆក្កវសេន ទស្សេតុំ បុន ទេសនំ អារភិ. តត្ថ អជ្ឈត្តិកានីតិ អជ្ឈត្តជ្ឈត្តិកានិ. ពាហិរានីតិ តតោ អជ្ឈត្តជ្ឈត្តតោ ពហិភូតានិ. វិត្ថារតោ បន អាយតនកថា វិសុទ្ធិមគ្គេ កថិតាវ. វិញ្ញាណកាយាតិ វិញ្ញាណសមូហា. ចក្ខុវិញ្ញាណន្តិ ចក្ខុបសាទនិស្សិតំ កុសលាកុសលវិបាកវិញ្ញាណំ. ឯស នយោ សព្ពត្ថ. ចក្ខុសម្ផស្សោតិ ចក្ខុនិស្សិតោ សម្ផស្សោ. សោតសម្ផស្សាទីសុបិ ឯសេវ នយោ. មនោសម្ផស្សោតិ ឥមេ ទស សម្ផស្សេ ឋបេត្វា សេសោ សព្ពោ មនោសម្ផស្សោ នាម. វេទនាឆក្កម្បិ ឯតេនេវ នយេន វេទិតព្ពំ. រូបសញ្ញាតិ រូបំ អារម្មណំ កត្វា ឧប្បន្នា សញ្ញា. ឯតេនុបាយេន សេសាបិ វេទិតព្ពា. ចេតនាឆក្កេបិ ឯសេវ នយោ. តថា តណ្ហាឆក្កេ.

អគារវោតិ គារវវិរហិតោ. អប្បតិស្សោតិ អប្បតិស្សយោ អនីចវុត្តិ. ឯត្ថ បន យោ ភិក្ខុ សត្ថរិ ធរមានេ តីសុ កាលេសុ ឧបដ្ឋានំ ន យាតិ. សត្ថរិ អនុបាហនេ ចង្កមន្តេ សឧបាហនោ ចង្កមតិ, នីចេ ចង្កមន្តេ ឧច្ចេ ចង្កមតិ, ហេដ្ឋា វសន្តេ ឧបរិ វសតិ, សត្ថុទស្សនដ្ឋានេ ឧភោ អំសេ បារុបតិ, ឆត្តំ ធារេតិ, ឧបាហនំ ធារេតិ, នហាយតិ, ឧច្ចារំ វា បស្សាវំ វា ករោតិ. បរិនិព្ពុតេ បន ចេតិយំ វន្ទិតុំ ន គច្ឆតិ, ចេតិយស្ស បញ្ញាយនដ្ឋានេ សត្ថុទស្សនដ្ឋានេ វុត្តំ សព្ពំ ករោតិ, អយំ សត្ថរិ អគារវោ នាម. យោ បន ធម្មស្សវនេ សំឃុដ្ឋេ សក្កច្ចំ ន គច្ឆតិ, សក្កច្ចំ ធម្មំ ន សុណាតិ, សមុល្លបន្តោ និសីទតិ, សក្កច្ចំ ន គណ្ហាតិ, ន វាចេតិ, អយំ ធម្មេ អគារវោ នាម. យោ បន ថេរេន ភិក្ខុនា អនជ្ឈិដ្ឋោ ធម្មំ ទេសេតិ, និសីទតិ, បញ្ហំ កថេតិ, វុឌ្ឍេ ភិក្ខូ ឃដ្ដេន្តោ គច្ឆតិ, តិដ្ឋតិ, និសីទតិ, ទុស្សបល្លត្ថិកំ វា ហត្ថបល្លត្ថិកំ វា ករោតិ, សង្ឃមជ្ឈេ ឧភោ អំសេ បារុបតិ, ឆត្តុបាហនំ ធារេតិ, អយំ សង្ឃេ អគារវោ នាម. ឯកភិក្ខុស្មិម្បិ ហិ អគារវេ កតេ សង្ឃេ អគារវោ កតោវ ហោតិ. តិស្សោ សិក្ខា បន អបូរយមានោវ សិក្ខាយ អគារវោ នាម. អប្បមាទលក្ខណំ អននុព្រូហយមានោ អប្បមាទេ អគារវោ នាម. ទុវិធម្បិ បដិសន្ថារំ អករោន្តោ បដិសន្ថារេ អគារវោ នាម. ឆ គារវា វុត្តប្បដិបក្ខវសេន វេទិតព្ពា.

សោមនស្សូបវិចារាតិ សោមនស្សសម្បយុត្តា វិចារា. សោមនស្សដ្ឋានិយន្តិ សោមនស្សការណភូតំ. ឧបវិចរតីតិ វិតក្កេន វិតក្កេត្វា វិចារេន បរិច្ឆិន្ទតិ. ឯស នយោ សព្ពត្ថ. ទោមនស្សូបវិចារាបិ ឯវមេវ វេទិតព្ពា. តថា ឧបេក្ខូបវិចារា. សារណីយធម្មា ហេដ្ឋា វិត្ថារិតា. ទិដ្ឋិសាមញ្ញគតោតិ ឥមិនា បន បទេន កោសម្ពកសុត្តេ បឋមមគ្គោ កថិតោ. ឥធ ចត្តារោបិ មគ្គា.