សោមនស្សបដិលាភកថាវណ្ណនា

៣៦៨. វេទបដិលាភន្តិ តុដ្ឋិបដិលាភំ. ទេវាសុរសង្គាមោតិ ទេវានញ្ច អសុរានញ្ច សង្គាមោ. សមុបព្យូឡ្ហោតិ សមាបន្នោ នលាដេន នលាដំ បហរណាការប្បត្តោ វិយ. ឯតេសំ កិរ កទាចិ មហាសមុទ្ទបិដ្ឋេ សង្គាមោ ហោតិ តត្ថ បន ឆេទនវិជ្ឈនាទីហិ អញ្ញមញ្ញំ ឃាតោ នាម នត្ថិ, ទារុមេណ្ឌកយុទ្ធំ វិយ ជយបរាជយមត្តមេវ ហោតិ. កទាចិ ទេវា ជិនន្តិ, កទាចិ អសុរា. តត្ថ យស្មិំ សង្គាមេ ទេវា បុន អបច្ចាគមនាយ អសុរេ ជិនិំសុ, តំ សន្ធាយ តស្មិំ ខោ បន ភន្តេតិអាទិមាហ. ឧភយមេតន្តិ ឧភយំ ឯតំ. ទុវិធម្បិ ឱជំ ឯត្ថ ទេវលោកេ ទេវាយេវ បរិភុញ្ជិស្សន្តីតិ ឯវមស្ស អាវជ្ជន្តស្ស ពលវបីតិសោមនស្សំ ឧប្បជ្ជិ. សទណ្ឌាវចរោតិ សទណ្ឌាវចរកោ, ទណ្ឌគ្គហណេន សត្ថគ្គហណេន សទ្ធិំ អហោសិ, ន និក្ខិត្តទណ្ឌសត្ថោតិ ទស្សេតិ. ឯកន្តនិព្ពិទាយាតិ ឯកន្តេនេវ វដ្ដេ និព្ពិន្ទនត្ថាយាតិ សព្ពំ មហាគោវិន្ទសុត្តេ វុត្តមេវ.

៣៦៩. បវេទេសីតិ កថេសិ ទីបេសិ. ឥធេវាតិ ឥមស្មិញ្ញេវ ឱកាសេ. ទេវភូតស្ស មេ សតោតិ ទេវស្ស មេ សតោ. បុនរាយុ ច មេ លទ្ធោតិ បុន អញ្ញេន កម្មវិបាកេន មេ ជីវិតំ លទ្ធន្តិ, ឥមិនា អត្តនោ ចុតភាវំ ចេវ ឧបបន្នភាវញ្ច អាវិករោតិ.

ទិវិយា កាយាតិ ទិព្ពា អត្តភាវា. អាយុំ ហិត្វា អមានុសន្តិ ទិព្ពំ អាយុំ ជហិត្វា. អមូឡ្ហោ គព្ភមេស្សាមីតិ និយតគតិកត្តា អមូឡ្ហោ ហុត្វា. យត្ថ មេ រមតី មនោតិ យត្ថ មេ មនោ រមិស្សតិ, តត្ថេវ ខត្តិយកុលាទីសុ គព្ភំ ឧបគច្ឆិស្សាមីតិ សត្តក្ខត្តុំ ទេវេ ច មានុសេ ចាតិ ឥមមត្ថំ ទីបេតិ.

ញាយេន វិហរិស្សាមីតិ មនុស្សេសុ ឧបបន្នោបិ មាតរំ ជីវិតា វោរោបនាទីនំ អភព្ពត្តា ញាយេន ការណេន សមេន វិហរិស្សាមីតិ អត្ថោ.

សម្ពោធិ ចេ ភវិស្សតីតិ ឥទំ សកទាគាមិមគ្គំ សន្ធាយ វទតិ, សចេ សកទាគាមី ភវិស្សាមីតិ ទីបេតិ. អញ្ញាតា វិហរិស្សាមីតិ អញ្ញាតា អាជានិតុកាមោ ហុត្វា វិហរិស្សាមិ. ស្វេវ អន្តោ ភវិស្សតីតិ សោ ឯវ មេ មនុស្សលោកេ អន្តោ ភវិស្សតីតិ.

បុន ទេវោ ភវិស្សាមិ, ទេវលោកស្មិំ ឧត្តមោតិ បុន ទេវលោកស្មិំ ឧត្តមោ សក្កោ ទេវានមិន្ទោ ភវិស្សាមីតិ វទតិ.

អន្តិមេ វត្តមានម្ហីតិ អន្តិមេ ភវេ វត្តមានេ. សោ និវាសោ ភវិស្សតីតិ យេ តេ អាយុនា ច បញ្ញាយ ច អកនិដ្ឋា ជេដ្ឋកា សព្ពទេវេហិ បណីតតរា ទេវា, អវសានេ មេ សោ និវាសោ ភវិស្សតិ. អយំ កិរ តតោ សក្កត្តភាវតោ ចុតោ តស្មិំ អត្តភាវេ អនាគាមិមគ្គស្ស បដិលទ្ធត្តា ឧទ្ធំសោតោ អកនិដ្ឋគាមី ហុត្វា អវិហាទីសុ និព្ពត្តន្តោ អវសានេ អកនិដ្ឋេ និព្ពត្តិស្សតិ. តំ សន្ធាយ ឯវមាហ. ឯស កិរ អវិហេសុ កប្បសហស្សំ វសិស្សតិ, អតប្បេសុ ទ្វេ កប្បសហស្សានិ, សុទស្សេសុ ចត្តារិ កប្បសហស្សានិ, សុទស្សីសុ អដ្ឋ, អកនិដ្ឋេសុ សោឡសាតិ ឯកតិំស កប្បសហស្សានិ ព្រហ្មអាយុំ អនុភវិស្សតិ. សក្កោ ទេវរាជា អនាថបិណ្ឌិកោ គហបតិ វិសាខា មហាឧបាសិកាតិ តយោបិ ហិ ឥមេ ឯកប្បមាណអាយុកា ឯវ, វដ្ដាភិរតសត្តា នាម ឯតេហិ សទិសា សុខភាគិនោ នាម នត្ថិ.

៣៧០. អបរិយោសិតសង្កប្បោតិ អនិដ្ឋិតមនោរថោ. យស្សុ មញ្ញាមិ សមណេតិ យេ ច សមណេ បវិវិត្តវិហារិនោតិ មញ្ញាមិ.

អារាធនាតិ សម្បាទនា. វិរាធនាតិ អសម្បាទនា. ន សម្បាយន្តីតិ សម្បាទេត្វា កថេតុំ ន សក្កោន្តិ.

អាទិច្ចពន្ធុនន្តិ អាទិច្ចោបិ គោតមគោត្តោ, ភគវាបិ គោតមគោត្តោ, តស្មា ឯវមាហ. យំ ករោមសីតិ យំ បុព្ពេ ព្រហ្មុនោ នមក្ការំ ករោម. សមំ ទេវេហីតិ ទេវេហិ សទ្ធិំ, ឥតោ បដ្ឋាយ ឥទានិ អម្ហាកំ ព្រហ្មុនោ នមក្ការករណំ នត្ថីតិ ទស្សេតិ. សាមំ ករោមាតិ នមក្ការំ ករោម.

៣៧១. បរាមសិត្វាតិ តុដ្ឋចិត្តោ សហាយំ ហត្ថេន ហត្ថម្ហិ បហរន្តោ វិយ បថវិំ បហរិត្វា, សក្ខិភាវត្ថាយ វា បហរិត្វា ‘‘យថា ត្វំ និច្ចលោ, ឯវមហំ ភគវតី’’តិ. អជ្ឈិដ្ឋបញ្ហាតិ អជ្ឈេសិតបញ្ហា បត្ថិតបញ្ហា. សេសំ សព្ពត្ថ ឧត្តានមេវាតិ.

ឥតិ សុមង្គលវិលាសិនិយា ទីឃនិកាយដ្ឋកថាយំ

សក្កបញ្ហសុត្តវណ្ណនា និដ្ឋិតា.