ពុទ្ធសរីរបូជាវណ្ណនា

២២៧. សព្ពញ្ច តាឡាវចរន្តិ សព្ពំ តូរិយភណ្ឌំ. សន្និបាតេថាតិ ភេរិំ ចរាបេត្វា សមាហរថ. តេ តថេវ អកំសុ. មណ្ឌលមាឡេតិ ទុស្សមណ្ឌលមាឡេ. បដិយាទេន្តាតិ សជ្ជេន្តា.

ទក្ខិណេន ទក្ខិណន្តិ នគរស្ស ទក្ខិណទិសាភាគេនេវ ទក្ខិណទិសាភាគំ. ពាហិរេន ពាហិរន្តិ អន្តោនគរំ អប្បវេសេត្វា ពាហិរេនេវ នគរស្ស ពាហិរបស្សំ ហរិត្វា. ទក្ខិណតោ នគរស្សាតិ អនុរាធបុរស្ស ទក្ខិណទ្វារសទិសេ ឋានេ ឋបេត្វា សក្ការសម្មានំ កត្វា ជេតវនសទិសេ ឋានេ ឈាបេស្សាមាតិ អត្ថោ.

២២៨. អដ្ឋ មល្លបាមោក្ខាតិ មជ្ឈិមវយា ថាមសម្បន្នា អដ្ឋមល្លរាជានោ. សីសំ ន្ហាតាតិ សីសំ ធោវិត្វា នហាតា. អាយស្មន្តំ អនុរុទ្ធន្តិ ថេរោវ ទិព្ពចក្ខុកោតិ បាកដោ, តស្មា តេ សន្តេសុបិ អញ្ញេសុ មហាថេរេសុ – ‘‘អយំ នោ បាកដំ កត្វា កថេស្សតី’’តិ ថេរំ បុច្ឆិំសុ. កថំ បន, ភន្តេ, ទេវតានំ អធិប្បាយោតិ ភន្តេ, អម្ហាកំ តាវ អធិប្បាយំ ជានាម. ទេវតានំ កថំ អធិប្បាយោតិ បុច្ឆន្តិ. ថេរោ បឋមំ តេសំ អធិប្បាយំ ទស្សេន្តោ តុម្ហាកំ ខោតិអាទិមាហ. មកុដពន្ធនំ នាម មល្លានំ ចេតិយន្តិ មល្លរាជូនំ បសាធនមង្គលសាលាយ ឯតំ នាមំ. ចិត្តីកតដ្ឋេន បនេសា ‘‘ចេតិយ’’ន្តិ វុច្ចតិ.

២២៩. យាវ សន្ធិសមលសង្កដីរាតិ ឯត្ថ សន្ធិ នាម ឃរសន្ធិ. សមលំ នាម គូថរាសិនិទ្ធមនបនាឡិ. សង្កដីរំ នាម សង្ការដ្ឋានំ. ទិព្ពេហិ ច មានុសកេហិ ច នច្ចេហីតិ ឧបរិ ទេវតានំ នច្ចានិ ហោន្តិ, ហេដ្ឋា មនុស្សានំ. ឯស នយោ គីតាទីសុ. អបិច ទេវតានំ អន្តរេ មនុស្សា, មនុស្សានំ អន្តរេ ទេវតាតិ ឯវម្បិ សក្ករោន្តា បូជេន្តា អគមំសុ. មជ្ឈេន មជ្ឈំ នគរស្ស ហរិត្វាតិ ឯវំ ហរិយមានេ ភគវតោ សរីរេ ពន្ធុលមល្លសេនាបតិភរិយា មល្លិកា នាម – ‘‘ភគវតោ សរីរំ អាហរន្តី’’តិ សុត្វា អត្តនោ សាមិកស្ស កាលំ កិរិយតោ បដ្ឋាយ អបរិភុញ្ជិត្វា ឋបិតំ វិសាខាយ បសាធនសទិសំ មហាលតាបសាធនំ នីហរាបេត្វា – ‘‘ឥមិនា សត្ថារំ បូជេស្សាមី’’តិ តំ មជ្ជាបេត្វា គន្ធោទកេន ធោវិត្វា ទ្វារេ ឋិតា.

តំ កិរ បសាធនំ តាសញ្ច ទ្វិន្នំ ឥត្ថីនំ, ទេវទានិយចោរស្ស គេហេតិ តីសុយេវ ឋានេសុ អហោសិ. សា ច សត្ថុ សរីរេ ទ្វារំ សម្បត្តេ – ‘‘ឱតារេថ, តាតា, សត្ថុសរីរ’’ន្តិ វត្វា តំ បសាធនំ សត្ថុសរីរេ បដិមុញ្ចិ. តំ សីសតោ បដ្ឋាយ បដិមុក្កំ យាវបាទតលាគតំ. សុវណ្ណវណ្ណំ ភគវតោ សរីរំ សត្តរតនមយេន មហាបសាធនេន បសាធិតំ អតិវិយ វិរោចិត្ថ. តំ សា ទិស្វា បសន្នចិត្តា បត្ថនំ អកាសិ – ‘‘ភគវា យាវ វដ្ដេ សំសរិស្សាមិ, តាវ មេ បាដិយេក្កំ បសាធនកិច្ចំ មា ហោតុ, និច្ចំ បដិមុក្កបសាធនសទិសមេវ សរីរំ ហោតូ’’តិ.

អថ ភគវន្តំ សត្តរតនមយេន មហាបសាធនេន ឧក្ខិបិត្វា បុរត្ថិមេន ទ្វារេន នីហរិត្វា បុរត្ថិមេន នគរស្ស មកុដពន្ធនំ មល្លានំ ចេតិយំ, ឯត្ថ ភគវតោ សរីរំ និក្ខិបិំសុ.