អានន្ទយាចនកថា

១៧៨. អលន្តិ បដិក្ខេបវចនមេតំ. ពោធិន្តិ ចតុមគ្គញាណបដិវេឃំ. សទ្ទហសិ ត្វន្តិ ឯវំ វុត្តភាវំ តថាគតស្ស សទ្ទហសីតិ វទតិ. តស្មាតិហានន្ទាតិ យស្មា ឥទំ វចនំ សទ្ទហសិ, តស្មា តុយ្ហេវេតំ ទុក្កដន្តិ ទស្សេតិ.

១៧៩. ឯកមិទាហន្តិ ឥទំ ភគវា – ‘‘ន កេវលំ អហំ ឥធេវ តំ អាមន្តេសិំ, អញ្ញទាបិ អាមន្តេត្វា ឱឡារិកំ និមិត្តំ អកាសិំ, តម្បិ តយា ន បដិវិទ្ធំ, តវេវាយំ អបរាធោ’’តិ ឯវំ សោកវិនោទនត្ថាយ នានប្បការតោ ថេរស្សេវ ទោសារោបនត្ថំ អារភិ.

១៨៣. បិយេហិ មនាបេហីតិ មាតាបិតាភាតាភគិនិអាទិកេហិ ជាតិយា នានាភាវោ, មរណេន វិនាភាវោ, ភវេន អញ្ញថាភាវោ. តំ កុតេត្ថ លព្ភាតិ តន្តិ តស្មា, យស្មា សព្ពេហេវ បិយេហិ មនាបេហិ នានាភាវោ, តស្មា ទស បារមិយោ បូរេត្វាបិ, សម្ពោធិំ បត្វាបិ, ធម្មចក្កំ បវត្តេត្វាបិ, យមកបាដិហារិយំ ទស្សេត្វាបិ, ទេវោរោហណំ កត្វាបិ, យំ តំ ជាតំ ភូតំ សង្ខតំ បលោកធម្មំ, តំ វត តថាគតស្សាបិ សរីរំ មា បលុជ្ជីតិ នេតំ ឋានំ វិជ្ជតិ, រោទន្តេនាបិ កន្ទន្តេនាបិ ន សក្កា តំ ការណំ លទ្ធុន្តិ. បុន បច្ចាវមិស្សតីតិ យំ ចត្តំ វន្តំ, តំ វត បុន បដិខាទិស្សតីតិ អត្ថោ.

១៨៤. យថយិទំ ព្រហ្មចរិយន្តិ យថា ឥទំ សិក្ខាត្តយសង្គហំ សាសនព្រហ្មចរិយំ. អទ្ធនិយន្តិ អទ្ធានក្ខមំ. ចិរដ្ឋិតិកន្តិ ចិរប្បវត្តិវសេន ចិរដ្ឋិតិកំ. ចត្តារោ សតិបដ្ឋានាតិអាទិ សព្ពំ លោកិយលោកុត្តរវសេនេវ កថិតំ. ឯតេសំ បន ពោធិបក្ខិយានំ ធម្មានំ វិនិច្ឆយោ សព្ពាការេន វិសុទ្ធិមគ្គេ បដិបទាញាណទស្សនវិសុទ្ធិនិទ្ទេសេ វុត្តោ. សេសមេត្ថ ឧត្តានមេវាតិ.

តតិយភាណវារវណ្ណនា និដ្ឋិតា.