២. សុត្តសាធនវណ្ណនា

២៩៨. សុត្តសាធនេ បន ន វត្តព្ពន្តិ បុច្ឆា សកវាទិស្ស. តត្ថ នត្ថិ ចេតេតិ នត្ថិ ច ឯតេ ធម្មាតិ អត្ថោ. ខន្ធាទិភាវេ សតិ នត្ថិតំ អនិច្ឆន្តស្ស អាមន្តាតិ បដិញ្ញា បរវាទិស្ស, អថ នេសំ នត្ថិភាវសាធនត្ថំ សុត្តាហរណំ សកវាទិស្ស. ទុតិយបុច្ឆាបិ បរវាទិស្ស, បដិញ្ញា សកវាទិស្ស, សុត្តាហរណំ បរវាទិស្ស. តំ បន នេសំ ខន្ធាទិភាវមេវ សាធេតិ, ន អត្ថិភាវន្តិ អាហដម្បិ អនាហដសទិសមេវាតិ.

អតីតំ ខន្ធាតិអាទិកថាវណ្ណនា.