៦. អតីតក្ខន្ធាទិកថា

១. នសុត្តសាធនកថាវណ្ណនា

២៩៧. ឥទានិ ‘‘អតីតំ ខន្ធា’’តិអាទិកថា ហោតិ. តត្ថ ខន្ធាទិភាវាវិជហនតោ អតីតានាគតានំ អត្ថិតំ ឥច្ឆន្តស្ស អតីតំ ខន្ធាតិ បុច្ឆា បរវាទិស្ស, អតីតស្ស ខន្ធសង្គហិតត្តា អាមន្តាតិ បដិញ្ញា សកវាទិស្ស. បុន អតីតំ នត្ថីតិ បុច្ឆា បរវាទិស្ស, តស្ស និរុត្តិបថសុត្តេន អត្ថិតាយ វារិតត្តា បដិក្ខេបោ សកវាទិស្ស. អាយតនធាតុបុច្ឆាសុបិ អនាគតបញ្ហេសុបិ បច្ចុប្បន្នេន សទ្ធិំ សំសន្ទិត្វា អនុលោមបដិលោមតោ អាគតបញ្ហេសុបិ ‘‘អតីតំ រូប’’ន្តិអាទិបញ្ហេសុបិ ឥមិនាវុបាយេន អត្ថោ វេទិតព្ពោ.

២. សុត្តសាធនវណ្ណនា

២៩៨. សុត្តសាធនេ បន ន វត្តព្ពន្តិ បុច្ឆា សកវាទិស្ស. តត្ថ នត្ថិ ចេតេតិ នត្ថិ ច ឯតេ ធម្មាតិ អត្ថោ. ខន្ធាទិភាវេ សតិ នត្ថិតំ អនិច្ឆន្តស្ស អាមន្តាតិ បដិញ្ញា បរវាទិស្ស, អថ នេសំ នត្ថិភាវសាធនត្ថំ សុត្តាហរណំ សកវាទិស្ស. ទុតិយបុច្ឆាបិ បរវាទិស្ស, បដិញ្ញា សកវាទិស្ស, សុត្តាហរណំ បរវាទិស្ស. តំ បន នេសំ ខន្ធាទិភាវមេវ សាធេតិ, ន អត្ថិភាវន្តិ អាហដម្បិ អនាហដសទិសមេវាតិ.

អតីតំ ខន្ធាតិអាទិកថាវណ្ណនា.