៤. តិកទុកបដ្ឋានវណ្ណនា

តិកទុកបដ្ឋានេបិ កុសលំ ហេតុំ ធម្មំ បដិច្ច កុសលោ ហេតុ ធម្មោ ឧប្បជ្ជតិ ហេតុបច្ចយាតិ បញ្ហាមត្តុទ្ធារវសេនេវ ទេសនា កតា. តត្ថ យថា ហេដ្ឋា ហេតុទុកេន សទ្ធិំ កុសលបទំ យោជេត្វា សព្ពបច្ចយវសេន សព្ពវារេសុ សង្ខេបតោ ទេសនា កតា, ឯវមិធ កុសលត្តិកេន សទ្ធិំ ហេតុបទំ យោជេត្វា សព្ពបច្ចយវសេន សព្ពវារេសុ សង្ខេបតោ ទេសនា កតា. យថា ច ហេតុបទំ, ឯវំ នហេតុបទម្បិ កុសលត្តិកេន សទ្ធិំ យោជេត្វា កុសលត្តិកហេតុទុកំ និដ្ឋាបិតំ. តតោ បរំ សុខាយ វេទនាយ សម្បយុត្តំ ហេតុំ ធម្មន្តិអាទិនា នយេន វេទនាត្តិកហេតុទុកាទីនិ ឯកវីសតិ តិកទុកានិ ទស្សិតានិ.

ឯវំ ពាវីសតិយា តិកេហិ សទ្ធិំ ហេតុទុកំ យោជេត្វា បុន តេហិយេវ សទ្ធិំ សហេតុកទុកាទយោ សរណទុកបរិយោសានា លព្ភមានវសេន សព្ពទុកា យោជិតា. ឥធាបិ យំ យំ បទំ យោជនំ ន គច្ឆតិ, តំ តំ បាឡិយំយេវ បដិក្ខិត្តំ. ឯវំ ទុកសតំ គហេត្វា ទ្វាវីសតិយា តិកេសុ បក្ខិបិត្វា តិកទុកបដ្ឋានំ នាម ទេសិតំ. តត្រាបិ យេន យេន នយេន បាឡិ សង្ខិត្តា, សោ សោ នយោ វិត្ថារតោ វេទិតព្ពោ.

តិកទុកបដ្ឋានវណ្ណនា.