៤. ឧបាទិន្នត្តិកវណ្ណនា

៥១. ឧបាទិន្នុបាទានិយត្តិកស្ស បញ្ហាវារេ វត្ថុ ឧបាទានិយានំ ខន្ធានំ បុរេជាតបច្ចយេន បច្ចយោតិ បវត្តិំ សន្ធាយ វុត្តំ. បដិសន្ធិយំ បន តំ បុរេជាតំ ន ហោតិ.

៧២. ឧបាទិន្នុបាទានិយោ កពឡីការោ អាហារោ ឧបាទិន្នុបាទានិយស្ស កាយស្ស អាហារបច្ចយេន បច្ចយោតិ ឯត្ថ ឧបាទិន្នុបាទានិយោ កពឡីការាហារោ នាម កម្មសមុដ្ឋានានំ រូបានំ អព្ភន្តរគតា ឱជា. ឧបាទិន្នុបាទានិយស្ស កាយស្សាតិ តស្សេវ កម្មសមុដ្ឋានរូបកាយស្ស អាហារបច្ចយេន បច្ចយោ. រូបជីវិតិន្ទ្រិយំ វិយ កដត្តារូបានំ អនុបាលនឧបត្ថម្ភនវសេន បច្ចយោ, ន ជនកវសេន. យំ បន មណ្ឌូកាទយោ គិលិត្វា ឋិតានំ អហិអាទីនំ កាយស្ស ជីវមានកមណ្ឌូកាទិសរីរេ ឱជា អាហារបច្ចយេន បច្ចយោតិ វទន្តិ, តំ ន គហេតព្ពំ. ន ហិ ជីវមានកសរីរេ ឱជា អញ្ញស្ស សរីរស្ស អាហារបច្ចយតំ សាធេតិ. អនុបាទិន្នុបាទានិយស្ស កាយស្សាតិ ឯត្ថ បន ជនកវសេនាបិ លព្ភតិ. ឧបាទិន្នុបាទានិយស្ស ច អនុបាទិន្នុបាទានិយស្ស ចាតិ ឯត្ថ ឯកស្ស ឧបត្ថម្ភកវសេន, ឯកស្ស ជនកវសេន, ឧភិន្នម្បិ វា ឧបត្ថម្ភកវសេនេវ វុត្តោ. ទ្វេ បន អាហារា ឯកតោ បច្ចយា ហោន្តា ឧបត្ថម្ភកាវ ហោន្តិ, ន ជនកា. សេសមេត្ថ បាឡិមេវ សាធុកំ ឱលោកេត្វា វេទិតព្ពំ.

ឧបាទិន្នត្តិកវណ្ណនា.