៣. សញ្ញោជនកថាវណ្ណនា

៨៨១-៨៨២. ឥទានិ សញ្ញោជនកថា នាម ហោតិ. តត្ថ យស្មា អរហា សព្ពំ ពុទ្ធវិសយំ ន ជានាតិ, តស្មា តស្ស តត្ថ អវិជ្ជាវិចិកិច្ឆាហិ អប្បហីនាហិ ភវិតព្ពន្តិ សញ្ញាយ ‘‘អត្ថិ កិញ្ចិ សញ្ញោជនំ អប្បហាយ អរហត្តប្បត្តី’’តិ យេសំ លទ្ធិ, សេយ្យថាបិ មហាសង្ឃិកានំ, តេ សន្ធាយ បុច្ឆា សកវាទិស្ស, បដិញ្ញា ឥតរស្ស. អត្ថិ កិញ្ចិ សក្កាយទិដ្ឋីតិអាទិ អរហតោ សព្ពសំយោជនប្បហានទស្សនត្ថំ វុត្តំ. សព្ពំ ពុទ្ធវិសយន្តិ បញ្ហទ្វយេ អរហតោ សព្ពញ្ញុតញ្ញាណាភាវេន បដិសេធោ កតោ, ន អវិជ្ជាវិចិកិច្ឆានំ អប្បហានេន. ឥតរោ បន តេសំ អប្បហីនតំ សន្ធាយ តេន ហីតិ លទ្ធិំ បតិដ្ឋបេតិ. សា អយោនិសោ បតិដ្ឋាបិតត្តា អប្បតិដ្ឋិតាវ ហោតីតិ.

សញ្ញោជនកថាវណ្ណនា.