១. សាសនកថាវណ្ណនា

៨៧៨. ឥទានិ សាសនកថា នាម ហោតិ. តត្ថ តិស្សោ សង្គីតិយោ សន្ធាយ ‘‘សាសនំ នវំ កត’’ន្តិ ច ‘‘អត្ថិ កោចិ តថាគតស្ស សាសនំ នវំ ករោតី’’តិ ច ‘‘លព្ភា តថាគតស្ស សាសនំ នវំ កាតុ’’ន្តិ ច យេសំ លទ្ធិ, សេយ្យថាបិ ឯកច្ចានំ ឧត្តរាបថកានំ; តេ សន្ធាយ តីសុបិ កថាសុ បុច្ឆា សកវាទិស្ស, បដិញ្ញា ឥតរស្ស. សតិបដ្ឋានាតិអាទិ សាសនំ នាម សតិបដ្ឋានាទយោ ចេវ អរិយធម្មា, កុសលាទីនញ្ច ទេសនា. តត្ថ យេសំ ភគវតា ទេសិតា សតិបដ្ឋានាទយោ, ឋបេត្វា តេ អញ្ញេសំ វា សតិបដ្ឋានាទីនំ ករណេន អកុសលាទីនំ វា កុសលាទិភាវករណេន សាសនំ នវំកតំ នាម ភវេយ្យ, កិំ តំ ឯវំ កតំ កេនចិ, អត្ថិ វា កោចិ ឯវំ ករោតិ, លព្ភា វា ឯវំ កាតុន្តិ តីសុបិ បុច្ឆាសុ ចោទនត្ថំ វុត្តំ. សេសំ សព្ពត្ថ យថាបាឡិមេវ និយ្យាតីតិ.

សាសនកថាវណ្ណនា.